सर्वात मोठ्या क्रिप्टो एक्सचेंज ‘बिनन्स’च्या सीईओंचा राजीनामा

यूएस कायदा मोडल्याबद्दल दोषी आढळले : रिचर्ड टेंग नवे सीईओ

वॉशिंग्टन

जगातील सर्वात मोठे क्रिप्टोकरन्सी एक्सचेंज बिनन्सचे संस्थापक आणि मुख्य कार्यकारी अधिकारी (सीईओ) चांगपेंग झाओ यांनी बुधवारी राजीनामा दिला. अमेरिकेतील मनी लाँडरिंग विरोधी कायद्याचे उल्लंघन केल्याप्रकरणी ते दोषी आढळले असल्याची माहिती आहे. क्रिप्टो एक्सचेंजला 4.3 अब्ज डॉलर्स (सुमारे 35 हजार कोटी रुपये) दंडही भरावा लागणार आहे.

यामुळे झाओ पुढील 3 वर्षे कंपनीत कोणतेही व्यवस्थापन पद भूषवू शकणार नाहीत. कंपनीतील प्रादेशिक बाजाराचे जागतिक प्रमुख रिचर्ड टेंग यांना नवीन सीईओ बनवण्यात आले आहे. न्याय विभाग, ट्रेझरी विभाग आणि कमोडिटी फ्युचर्स ट्रेडिंग कमिशन अनेक वर्षांपासून कंपनीची चौकशी करत होते.

बिनन्स येथे प्रादेशिक बाजाराचे जागतिक प्रमुख असलेले रिचर्ड टेंग यांना कंपनीचे सीईओ बनवण्यात आले आहे. तीन दशकांहून अधिक आर्थिक सेवा आणि नियामक अनुभवामुळे कंपनीला तिच्या वाढीच्या पुढील टप्प्यात नेणार असल्याचे टेंग यांनी स्पष्ट केले आहे.

बिनन्स 2017 मध्ये सुरू

बिनन्स हे 2017 मध्ये लाँच केलेले एक क्रिप्टो-एक्सचेंज होते. बिनन्स त्याच्या इकोसिस्टममध्ये अनेक क्रिप्टोएक्सचेंज आहेत जे त्यांनी विकत घेतले आणि तयार केले. याशिवाय, त्याची स्वत:ची क्रिप्टोकरन्सी, अनेक क्रिप्टो वॉलेट्स आणि नवीन क्रिप्टोकरन्सी लॉन्च करण्यासाठी लॉन्चपॅडदेखील आहे.