गुजरात जायंटस्कडून बेंगळूर बुल्स पराभूत

वृत्तसंस्था / हैद्राबाद

11 व्या प्रो कबड्डी लीग हंगामाला येथे प्रारंभ झाला असून गुजरात जायंटसने विजयी सलामी देताना बेंगळूर बुल्सचा 36-32 अशा चार गुणांच्या फरकाने पराभव केला. या सामन्यात बेंगळूर बुल्स संघातील प्रदीप नरवालने 1700 गुणांचा टप्पा पार केला.

या सामन्यात गुजरात जायंटस्तर्फे प्रतिक दाहीया, गुमान सिंग आणि सोमवीर यांची कामगिरी दर्जेदार झाली तर बेंगळूर बुल्सतर्फे प्रदीप नरवाल आणि अजिंक्य पवार यांनी चमकदार कामगिरी केली. या सामन्यातील पूर्वार्धात बेंगळूर बुल्सच्या प्रदीप नरवालने या स्पर्धेच्या इतिहासात 1700 गुणांचा टप्पा गाठण्याचा नवा विक्रम केला. बेंगळूर संघाला नरवालने पहिला गोल मिळवून दिला. बेंगळूरच्या चढाईची सुत्रे नरवाल आणि अजिंक्य पवार यांच्याकडे होती. पहिल्या 10 मिनिटांमध्ये दोन्ही संघ 7-7 असे बरोबरीत होते. मध्यंतरावेळी बेंगळूर बुल्सने गुजरात जायंटसवर 19-16 अशा तीन गुणांची आघाडी घेतली होती. पण खेळाच्या दुसऱ्या सत्रात शेवटच्या पाच मिनिटांमध्ये गुजरातच्या कबड्डीपटूंनी आक्रमक चढाया आणि भक्कम बचाव तंत्रावर बेंगळूर बुल्सचा 4 गुणांच्या फरकाने पराभव केला.