बेडोसा उपांत्य फेरीत

वृत्तसंस्था / बिजिंग

डब्ल्युटीएटूरवरील येथे सुरू असलेल्या चायना खुल्या आंतरराष्ट्रीय महिलांच्या टेनिस स्पर्धेत स्पेनच्या 19 व्या मानांकित पाओला बेडोसाने चीनच्या झेंग शुईचा पराभव करत उपांत्य फेरीत प्रवेश मिळविला.

गुरुवारी या स्पर्धेतील झालेल्या महिला एकेरीच्या उपांत्यपूर्व फेरीच्या सामन्यात बेडोसाने शुईचा 6-1, 7-6(7-4) अशा सेटमध्ये पराभव करत शेवटच्या चार खेळाडूंत स्थान मिळविले. गेल्या मे महिन्यापासून बेडोसाने 5 पैकी तीन स्पर्धांमध्ये उपांत्यफेरीपर्यंत मजल मारली आहे. आता बेडोसाचा उपांत्य फेरीचा सामना गॉफ आणि स्टारडोबित्सेव्हा यांच्यातील विजयी खेळाडू बरोबर होईल. अमेरिकेच्या गॉफने उपांत्यपूर्व फेरीत ओसाकाचा पराभव केला. ओसाकाला या सामन्यात पाठदुखापतीमुळे माघार घ्यावी लागली होती.

बेरेटेनीची विजयी सलामी

एटीपीटूरवरील येथे सुरू असलेल्या शांघाय मास्टर्स पुरुषांच्या टेनिस स्पर्धेत इटलीच्या मॅटो बेरेटेनीने एकेरीत विजयी सलामी देताना ओकोनेलचा पराभव केला. पहिल्या फेरीतील सामन्यात बेरेटेनीने ओकोनेलवर 7-6(9-7), 7-6(8-6) अशी मात केली. होल्गर रुने, गिरॉन, गोफीन, मुनेर, मेनसिक यांनी पहिल्या फेरीतील सामने जिंकून पुढील फेरीत स्थान मिळविले आहे.