ऑस्ट्रेलियन संघाकडून इंग्लंडचा व्हाईटवॉश

वृत्तसंस्था / अॅडलेड

तीन सामन्यांची टी-20 मालिका ऑस्ट्रेलियन महिला संघाने शनिवारी एकतर्फी जिंकताना शेवटच्या सामन्यात इंग्लंडवर 72 धावांनी दणदणीत विजय मिळविला. या शेवटच्या सामन्यात ऑस्ट्रेलियाच्या बेथ मुनीला सामनावीर म्हणून घोषित करण्यात आले.

या शेवटच्या सामन्यात ऑस्ट्रेलियाने नाणेफेक जिंकून प्रथम फलंदाजी करताना 20 षटकात 5 बाद 162 धावा जमविल्या. त्यानंतर इंग्लंडचा डाव 17.3 षटकात 90 धावांत आटोपला.

ऑस्ट्रेलियाच्या डावात सलामीच्या बेथ मुनी आणि व्हॉल यांनी 56 धावांची भागिदारी केली. व्हॉलने 21 चेंडूत 2 चौकारांसह 23 जमविल्या. लीचफिल्डने 1 चौकारांसह 12, इलेसीपेरीने 1 चौकारासह 12, हॅरीसने 1 षटकारासह 11 धावा केल्या. सदरलँड 3 धावांवर बाद झाली. मात्र बेथ मुनीने शेवटपर्यंतवर खेळपट्टीवर राहून 63 चेंडूत 10 चौकारांसह नाबाद 94 धावा झळकविल्या. ऑस्ट्रेलियाच्या डावात 1 षटकार आणि 14 चौकार नोंदविले गेले. ऑस्ट्रेलियाने पॉवरप्ले दरम्यानच्या 6 षटकात 44 धावा जमविल्या. मुनीने 41 चेंडूत 5 चौकारांसह अर्धशतक झळकविले. ऑस्ट्रेलियाचे अर्धशतक 41 चेंडूत, शतक 82 चेंडूत आणि दीड शतक 111 चेंडूत फलकावर लागले. ऑस्ट्रेलियाने 10 षटकाअखेर 1 बाद 76 धावा जमविल्या होत्या. इंग्लंडतर्फे स्मिथ, केम्प, डीन, इक्लेस्टोन, कॅप्से यांनी प्रत्येकी 1 गडी बाद केला.

प्रत्युत्तरादाखल खेळताना इंग्लंडच्या डावामध्ये कर्णधार नाईटने 38 चेंडूत 1 षटकार आणि 3 चौकारांसह 40 तर हॉजने 15 चेंडूत 3 चौकारांसह 17 धावा जमविल्या. इंग्लंडच्या उर्वरित फलंदाजांना दुहेरी धावसंख्या गाठता आली नाही. इंग्लंडच्या डावात 1 षटकार आणि 9 चौकार नोंदविले गेले. इंग्लंडने पॉवरप्ले दरम्यानच्या 6 षटकात 39 धावा जमविताना 3 गडी गमविले. इंग्लंडचे अर्धशतक 53 चेंडूत फलकावर लागले. 10 षटकाअखेर इंग्लंडची स्थिती 7 बाद 52 अशी होती. ऑस्ट्रेलियातर्फे वेरहॅमने 11 धावांत 3, ब्राऊनने 25 धावांत 2 तर शूट, किंग, सदरलँड व मॅकग्रा यांनी प्रत्येकी 1 गडी बाद केला.

संक्षिप्त धावफलक: ऑस्ट्रेलिया 20 षटकात 5 बाद 162 (मुनी नाबाद 94, व्हॉल 23, लीचफिल्ड 12, पेरी 12, हॅरिस 11), इंग्लंड 17.3 षटकात सर्वबाद 90 (नाईट 40, हॉज 17, व्हेरहॅम 3-11, ब्राऊन 2-25, मॅकग्रा, सदरलँड, किंग, शूट प्रत्येकी 1 बळी)