न्यू गुड्सशेड रोडवरील एटीएम फोडण्याचा प्रयत्न

खडेबाजार पोलीस ठाण्यात गुन्हा दाखल :  एटीएम फोडण्याचा प्रयत्न केल्यानंतर अलर्ट मेसेज

बेळगाव : सांबरा रोडवरील एसबीआयचे एटीएम फोडल्याची घटना ताजी असतानाच मंगळवारी मध्यरात्री न्यू गुड्सशेड रोडवरील एचडीएफसी बँकेचे एटीएम फोडण्याचा अयशस्वी प्रयत्न झाला आहे. याप्रकरणी एचडीएफसी बँकेचे अधिकारी संदीप गिडदेप्पा गिऱ्याप्पनावर, रा. सदाशिवनगर यांनी खडेबाजार पोलीस ठाण्यात फिर्याद दिली आहे. त्यानुसार पोलिसांनी सुनील सदानंद कोले (वय 59 रा. न्यू गुड्सशेड रोड) याला अटक करून नोटीस बजावून सोडून देण्यात आले. न्यू गुड्सशेड रोडवर एचडीएफसी बँकेचे एटीएम असून सदर एटीएम रात्रंदिवस सुरू असते.

मात्र त्या ठिकाणी सुरक्षा रक्षकांची नियुक्ती करण्यात आलेली नाही. याच संधीचा फायदा घेत मंगळवारी मध्यरात्री 3.30 ते 4.50 च्या दरम्यान एटीएम फोडण्याच्या उद्देशाने चोरटा एटीएममध्ये शिरला. एटीएम फोडण्याचा प्रयत्न केल्यानंतर बँकेच्या मुख्य कार्यालयाला अलर्ट मेसेज पोहोचला. तातडीने बँकेतून पोलीस मुख्यालयाला ही माहिती देण्यात आली. मुख्यालयातून खडेबाजार पोलिसांशी संपर्क साधून माहिती कळविण्यात आली. काही वेळानंतर लागलीच पोलिसांनी घटनास्थळी धाव घेतली. मात्र तोपर्यंत चोरटा पसार झाला होता. पंचनामा करत पाहणी करण्यात आली. यावेळी केवळ चोरीचा अयशस्वी प्रयत्न झाल्याचे निदर्शनास आले. पोलिसांनी तपास चक्रे गतिमान करत वरील संशयिताला अटक केली. संशयिताला नोटीस देऊन सोडण्यात आले.

चोरट्याच्या मुसक्या आवळल्या

न्यू गुड्सशेड रोडवरील एचडीएफसी बँकेच्या एटीएममध्ये चोरी करण्याचा प्रयत्न केलेल्या संशयितांची छबी सीसीटीव्ही कॅमेऱ्यात कैद झाली आहे. पोलिसांनी सदर सीसीटीव्ही फुटेज ताब्यात घेऊन संशयिताचा शोध करत तातडीने संशयिताच्या मुसक्या आवळल्या. दारुच्या नशेत त्याने हे कृत्य केल्याचे पोलिसांनी सांगितले.