आनंदनगर येथील रहिवाशाची आरोग्याच्या समस्यांमुळे आत्महत्या

बेळगाव : आनंदनगर-वडगाव येथील एका इसमाने राहत्या घरी गळफास घेऊन आत्महत्या केल्याची घटना शनिवारी रात्री उघडकीस आली आहे. शहापूर पोलीस स्थानकात या घटनेची नोंद झाली आहे. संतोष परशुराम कट्टीमनी (वय 49) मूळचा राहणार हल्याळ, जि. कारवार, सध्या राहणार आनंदनगर-वडगाव असे त्याचे नाव आहे. पोलीससूत्रांनी दिलेल्या माहितीनुसार संतोष वाहन अपघातात जखमी झाला होता. त्याच्या डोक्याला दुखापत झाली होती. तेव्हापासून मन:स्थिती ठीक नव्हती. एक महिन्यापूर्वी हृदयाघातही झाला होता. आरोग्याच्या समस्यांमुळे शनिवार दि. 29 नोव्हेंबर रोजी दुपारी 1.30 ते रात्री 9.45 या वेळेत राहत्या घरी ओढणीने गळफास घेऊन त्याने आपले जीवन संपविले आहे. शहापूर पोलिसांनी घटनास्थळी भेट देऊन पंचनामा केला. उत्तरीय तपासणीनंतर मृतदेह नातेवाईकांच्या ताब्यात देण्यात आला.