"मला एक मत द्या, उर्वरित आयुष्य तुमच्याच सेवेसाठी

अपक्ष उमेदवार अर्चना घारे-परब यांचे भावनिक आवाहन"

सावंतवाडी । प्रतिनिधी

सावंतवाडी मतदारसंघात आगामी विधानसभा निवडणुकीच्या तोंडावर प्रचंड राजकीय चुरस निर्माण झाली आहे. सर्वपक्षीय उमेदवारांनी प्रचाराला गती दिली असताना अपक्ष उमेदवार सौ. अर्चना घारे-परब यांनी आपल्या वेगळ्या मार्गाने, भावनिक व सेवाभावाने ओतप्रोत प्रचाराचा धडाका लावला आहे. "मला एक मत द्या, माझं उर्वरित आयुष्य तुमच्यासाठी समर्पित करेन," असे तीव्र शब्दात आवाहन करून त्यांनी मतदारांना एक नवा विचार दिला आहे.

ग्रामदेवतेच्या आशीर्वादाने प्रचाराची सुरुवात

सौ. घारे-परब यांनी आपल्या प्रचाराची सुरुवात श्री देवी माऊलीचे आशीर्वाद घेऊन केली. देव-देवतांचे आशीर्वाद घेऊन सुरू झालेल्या प्रचारात त्यांनी गावागावात जाऊन ग्रामस्थांना भेटायला सुरुवात केली आहे. शेर्ले, कास, निगुडे, रोणापाल, मडुरा, पाडलोस, आरोस, सातार्डा, कावठणी, तळवणे आदी गावांमध्ये भेटी घेऊन त्यांनी प्रत्येकाला आवाहन केले, "तुमच्या विश्वासाच्या बळावर माझं आयुष्य तुमच्या सेवेसाठी अर्पण करणार आहे. तुमचं मत माझ्या कामाच्या संकल्पाला आशीर्वाद ठरवेल." प्रचारादरम्यान सौ. घारे-परब यांनी अनेक गावांमध्ये भेटी घेतल्या, जिथे ग्रामस्थांनी त्यांच्या समस्या मांडल्या. रस्त्यांची दुरवस्था, अपुरा पाणीपुरवठा, अपुरे आरोग्यसेवाकेंद्र, वीजपुरवठा यांसारख्या अनेक मूलभूत सुविधांचा अभाव आहे. सध्या सत्तेत असलेल्या आमदार व नेत्यांनी या समस्या सोडविण्यासाठी पुरेसा प्रयत्न केला नसल्याबद्दल ग्रामस्थांमध्ये असंतोष आहे. यासोबतच, शेतकऱ्यांच्या मालाला हमीभाव, पीक विमा आदी विषयांवरही ग्रामस्थांनी असंतोष व्यक्त केला.

धनशक्तीविरुद्ध जनशक्ती - अपक्ष उमेदवाराची तळमळ

घारे-परब यांच्या मते ही निवडणूक धनशक्तीविरुद्ध जनशक्ती अशी आहे. "आज अनेक नेते एकमेकांवर चिखलफेक करत आहेत, मात्र समाजातील आरोग्य, रोजगार, शेतकऱ्यांचे प्रश्न हे त्यांच्या अजेंड्यावर नाहीत," असे त्यांनी जोरदारपणे मांडले. त्यांनी पुढे सांगितले की, "या निवडणुकीत तुम्हाला योग्य प्रतिनिधी निवडण्याचा अधिकार आहे, आणि तुमचा एक मत हा परिवर्तनासाठी महत्त्वपूर्ण आहे."घारे-परब  परब यानी काही मुद्दे उघड केले, की कसे बाहेरून आलेल्या काही उमेदवारांना उमेदवारी दिली जाते, जे स्थानिक पातळीवर काम केलेले नाहीत. "हे मनाला खूप वेदना देणारे आहे," असे त्यांनी सांगितले. "मी स्वतः अनेक वर्षे समाजसेवेसाठी काम केले आहे, परंतु आज बाहेरून आलेल्या व्यक्तींना पाठिंबा दिला जातो. हे कोकणाच्या भूमीसाठी न्याय्य नाही," असे त्यांनी सांगितले.

गावांमध्ये आत्मीयतेने गाठीभेटी आणि ग्रामस्थांचा प्रतिसाद

घारे-परब यांनी गावागावात जाऊन वैयक्तिक गाठीभेटी घेतल्या, जेणेकरून त्यांनी थेट जनतेशी संवाद साधता आला. त्यांनी व्यापारी वर्गाशीही गाठीभेट घेतली आणि सर्वसामान्य जनतेला आपल्या सेवेचे वचन दिले. त्यांच्या प्रत्येक बैठकीत ग्रामस्थांनी त्यांना उमेदवारीसाठी पाठिंबा व्यक्त केला. महिलांनी त्यांना शुभेच्छा दिल्या, तर युवकांनी त्यांच्या समर्थनासाठी कटिबद्ध असल्याचे सांगितले.

स्थलांतरित तरुणांचे प्रश्न आणि रोजगाराच्या संधींचा अभाव

घारे-परब यांच्या प्रचाराच्या दरम्यान, त्यांनी गावांमध्ये एकत्रित झालेल्या लोकांच्या समस्या ऐकल्या. त्यापैकी एक महत्त्वाची समस्या होती, स्थानिक युवकांना रोजगाराच्या संधींचा अभाव. बऱ्याच युवकांना बाहेर जाऊन काम करावे लागते, जे त्यांच्या कुटुंबापासून दूर होण्याचे कारण ठरते. त्यामुळे स्थानिक पातळीवर रोजगार निर्माण करण्यासाठी प्रयत्नांची गरज असल्याचे त्यांनी सांगितले.

ग्रामस्थांचा घारे-परब यांना विश्वासार्ह प्रतिसाद

घारे-परब यांच्यासोबत प्रचारात सहभागी झालेल्या गावातील मंडळींमध्ये पुंडलिक दळवी, नितेशा नाईक, सुनिता भाईप, मयुरी भाईप, निलेश परब, नारायण घोगळे, संजय भाईप, एकनाथ धुरी यांसारखे कार्यकर्ते होते. याव्यतिरिक्त ग्रामस्थांनीही त्यांना शुभेच्छा दिल्या आणि विजयाचा विश्वास व्यक्त केला. ग्रामस्थांच्या या प्रतिसादामुळे त्यांचे मनोबल उंचावले आहेघारे-परब यांचा प्रचार जनसामान्यांच्या भावनांना साद घालणारा आहे. "तुमचे प्रश्न हे माझे प्रश्न आहेत, आणि तुमचा एक मत माझ्या सेवेचे महत्त्वाचे साधन आहे," असे त्या सांगत आहेत. सौ. अर्चना घारे-परब यांचा प्रचार अतिशय आत्मीयतेचा आणि भावनिक स्वरूपाचा आहे. "माझं उर्वरित आयुष्य तुमच्यासाठी" असे म्हणत, त्यांनी मतदारांना एक विश्वासाचा नवा आधार दिला आहे.