जिल्हास्तरीय खो-खो स्पर्धेत आंबेवाडी संघ विजयी

विभागीय स्पर्धेसाठी संघ पात्र

वार्ताहर /हिंडलगा 

सार्वजनिक शिक्षण खाते व जिल्हा पंचायत बेळगाव यांच्यावतीने जिल्हा शिक्षणाधिकारी कार्यालयातर्फे बेळगाव तालुक्यातील आंबेवाडी येथील सरकारी प्राथमिक मराठी शाळेच्या भव्य क्रीडांगणावर प्राथमिक, माध्यमिक मुला- मुलींच्या खो खो स्पर्धांचे आयोजन केले होते. या स्पर्धेत आंबेवाडी येथील सरकारी प्राथमिक मराठी शाळेच्या मुलांच्या खो-खो संघाने अजिंक्यपद पटकावले. त्यामुळे या खो खो संघाची विभागीय स्तरावरील खो खो स्पर्धेत निवड झाली आहे. या संघाने केलेल्या उत्कृष्ट कामगिरीमुळे विभागीय स्पर्धेत यश मिळविण्याची संधी आहे.   या संघाला शाळेचे मुख्याध्यापक एस.वाय.बेन्नाळकर ,क्रीडा शिक्षिका सुवर्णा  सिद्धन्नवर, इतर सर्व शिक्षक, शाळा विकास व्यवस्थापन समिती, ग्रामपंचायत , माजी विद्यार्थी संघटना, मराठा स्पोर्ट्स व कोचर म्हणून अरविंद मनोळकर ,विजय जंगम ,लक्ष्मण बसुर्तेकर या सर्वांनी परिश्रम घेतले. मुलांच्या खो खो संघाचे सर्वत्र अभिनंदन होत आहे.