पुन्हा एकदा अजय -तब्बू जोडी

अजय देवगण आणि तब्बू चांगले मित्र असण्यासोबत अनेक चित्रपटांमध्ये त्यांनी एकत्र काम केले आहे. दोघांनीही कित्येक चित्रपटांमध्ये रोमान्सद्वारे प्रेक्षकांची मने जिंकली आहेत. आता पुन्हा एकदा त्यांच्यातील रोमँटिक केमिस्ट्री मोठ्या पडद्यावर दिसून येणार आहे.

‘बेबी’, ‘स्पेशल 26’ आणि ‘द फ्रीलान्सर’ यासारखे चित्रपट तसेच सीरिज तयार केलेल्या नीरज पांडे यांनी  आगामी चित्रपटाची घोषणा केली असून यात अजय देवगण आणि तब्बू मुख्य भूमिका साकारणार आहे. या चित्रपटाचे नाव ‘औरों में कहां दम था’ असे असणार आहे. अजय देवगणने देखील सोशल मीडियावर यासंबंधी माहिती दिली आहे. अभिनेत्याने नीरज पांडेसोबतच्या माझ्या भागीदारीची घोषणा करत असल्याचे नमूद पेले आहे. अजय देवगण आणि तब्बूचा हा चित्रपट पुढील वर्षी प्रदर्शित होणार आहे. हा चित्रपट 26 एप्रिल रोजी प्रदर्शित होणार असला तरीही तो चित्रपटगृहांमध्ये प्रदर्शित होणार का ओटीटीवर हे स्पष्ट करण्यात आलेले नाही. हा एक रोमँटिक म्युझिकल ड्रामा स्वरुपाचा असून याला एम.एम. किरावनी यांनी संगीत दिले आहे. त्यांना आरआरआर मधील ‘नाटू नाटू’ गाण्यासाठी ऑस्कर मिळाला आहे. या चित्रपटात अजय आणि तब्बूसोबत जिमी शेरगिल, सई मांजरेकर आणि शांतनू माहेश्वरी यासारखे कलाकार दिसून येतील. अजय आणि तब्बू यांनी एकत्र काम केलेले बहुतांश चित्रपट सुपरहिट ठरले आहेत.