अफगाणचा बांगलादेशवर वनडे मालिका विजय

मोहम्मद नबी ‘मालिकावीर’, ओमरझाई ‘सामनावीर’

► वृत्तसंस्था / शारजा

अफगाणने तीन सामन्यांच्या वनडे मालिकेत बांगलादेशचा 2-1 अशा फरकाने पराभव केला. अफगाणच्या मोहम्मद नबीला ‘मालिकावीर’ तर अझमतुल्ला ओमरझाईला ‘सामनावीर’ म्हणून घोषित करण्यात आले. या मालिकेतील तिसऱ्या सामन्यात अफगाणने बांगलादेशचा 10 चेंडू बाकी ठेवून 5 गड्यांनी पराभव केला.

या शेवटच्या सामन्यात बांगलादेशने नाणेफेक जिंकून प्रथम फलंदाजी करताना 50 षटकात 8 बाद 244 धावा जमविल्या. त्यानंतर अफगाणने 48.2 षटकात 5 बाद 246 धावा जमवित विजय नोंदविला.

बांगलादेशच्या डावामध्ये कर्णधार मेहदीहसन मिराजने 119 चेंडूत 4 चौकारांसह 66 तर मेहमुदुल्लाने 98 चेंडूत 3 षटकार आणि 7 चौकारांसह 98 धावा झळकविल्या. त्याचे शतक 2 धावांनी हुकले. सौम्या सरकारने 3 चौकारांसह 24 तर टी. हसनने 3 चौकारांसह 19 धावा जमविल्या. बांगलादेशच्या डावात 3 षटकार आणि 18 चौकार नोंदविले गेले. अफगाणतर्फे ओमरझाई सर्वात यशस्वी गोलंदाज ठरला. त्याने  37 धावांत 4 तर मोहम्मद नबी आणि रशिद खान यांनी प्रत्येकी 1 गडी बाद केला. बांगलादेशचे दोन फलंदाज धावचित झाले. बांगलादेशने पहिल्या पॉवरप्ले दरम्यानच्या 10 षटकात 56 धावा जमविताना 2 गडी गमविले. टी. हसन आणि सौम्य सरकार यांनी पहिल्या गड्यासाठी अर्धशतकी भागिदारी 49 चेंडूत नोंदविली. या जोडीने 53 धावांची भागिदारी करुन डावाला समाधानकारक सुरुवात करुन दिली. दुसऱ्या पॉवरप्लेमध्ये बांगलादेशने 108 धावांत 2 गडी गमविले. मेहमुदुल्लाने आपले अर्धशतक 63 चेंडूत 1 षटकार आणि 4 चौकारांच्या मदतीने झळकविले. मेहदीहसन मिराजने आपले अर्धशतक 106 चेंडूत 4 चौकारांच्या मदतीने पूर्ण केले. मेहमुदुल्ला आणि मेहदीहसन यांनी पाचव्या गड्यासाठी 145 धावांची भागिदारी केली.

प्रत्युत्तरादाखल खेळताना अफगाणचा सलामीचा फलंदाज गुरबाजने दमदार शतक झळकविले. त्याने 120 चेंडूत 7 षटकार आणि 5 चौकारांसह 101 धावा जमविल्या. अझमतुल्ला ओमरझाईने 77 चेंडूत 5 षटकार आणि 3 चौकारांसह नाबाद 70 धावा जमविताना गुरबाज समवेत चौथ्या गड्यासाठी 100 धावांची भागिदारी केली. मोहम्मद नबीने 27 चेंडूत 5 चौकारांसह नाबाद 34 धावा जमविताना ओमरझाई समवेत सहाव्या गड्यासाठी अभेद्य 58 धावांची भागिदारी केली. अफगाणच्या डावात 12 षटकार आणि 13 चौकार नोंदविले गेले. अफगाणने पहिल्या पॉवरप्ले दरम्यानच्या 10 षटकात 45 धावा जमविताना 1 गडी गमविला. गुरबाजचे अर्धशतक 60 चेंडूŠ 4 षटकार आणि 2 चौकारांच्या मदतीने झळकविले. गुरबाजने आपले शतक 117 चेंडूत 5 चौकार आणि 7 षटकारच्या मदतीने पूर्ण केले. दुसऱ्या पॉवरप्ले दरम्यानच्या 30 षटकामध्ये अफगाणने 142 धावांत 3 गडी गमविले. तसेच शेवटच्या पॉवरप्लेमध्ये अफगाणने 59 धावांत 1 गडी गमविला. बांगलादेशतर्फे नाहीद राणाने 40 धावांत 2, मुस्ताफिजुर रेहमानने 50 धावांत 2 तर मेहदीहसन मिराजने 1 गडी बाद केला.

संक्षिप्त धावफलक : बांगलादेश 50 षटकात 8 बाद 244 (मेहमुदुल्ला 98, मेहदीहसन मिराज 66, सरकार 24, टी. हसन 19, अवांतर 18, अझमतुल्ला ओमरझाई 4-37, नबी, रशीद खान प्रत्येकी 1 बळी), अफगाण 48.2 षटकात 5 बाद 246 (गुरबाज 101, अझमतुल्ला ओमरझाई नाबाद 70, नबी नाबाद 34, अटल 14, अवांतर 12, नाहीद राणा, मुस्तफिजुर रेहमान प्रत्येकी 2 बळी, मेहदीहसन मिराज 1-56)