‘आर्टिकल 370’मध्ये यामी गौतम

गुप्तचर अधिकाऱ्याची भूमिका साकारणार

अभिनेत्री यामी गौतम लवकरच ‘आर्टिकल 370’ या चित्रपटात दिसून येणार आहे. यामीच्या या चित्रपटाची दीर्घकाळापासून चर्चा सुरू आहे. या चित्रपटाचे पोस्टर आणि प्रदर्शनाची तारीख जाहीर करण्यात आली आहे. या चित्रपटात काश्मीरशी निगडित कहाणी दर्शविण्यात येणार आहे. जियो स्टुडिओजकडून या चित्रपटाचा टीझर शेअर करण्यात आला आहे. चित्रपटाची कथा काश्मीरमधून कलम 370 हद्दपार करण्यावर आधारित आहे. कलम 370 लागू असताना काश्मीरमधील राजकीय नेते कशाप्रकारे आर्थिक स्थितीला नुकसान पोहोचवित होते हे यात दाखविण्यात येणार आहे. यामी या चित्रपटात गुप्तचर अधिकाऱ्याची भूमिका साकारत आहे. या चित्रपटाचे दिग्दर्शन आदित्य सुहास जांभळे करत आहेत. जांभळे यांना यापूर्वी राष्ट्रीय चित्रपट पुरस्कार मिळालेला आहे. सोशल मीडियावर या नव्या चित्रपटावरून मोठी चर्चा सुरू आहे. यामी गौतमचा हा चित्रपट 23 फेब्रुवारी रोजी झळकणार आहे. यामी गौतमचा पती आदित्य धरने या चित्रपटाच्या निर्मितीची जबाबदारी पेलली आहे.