दुचाकीस्वाराला लुटणाऱ्या टोळीला अटक

सौंदत्ती पोलिसांची चार महिन्यांनंतर कारवाई : साडेआठ लाखांहून अधिक ऐवज जप्त

बेळगाव : मोटारसायकलस्वारावर हल्ला करून त्याच्या अंगावरील दागिने पळविणाऱ्या दरोडेखोरांच्या एका टोळीला सौंदत्ती पोलिसांनी तब्बल चार महिन्यांनंतर अटक केली आहे. त्यांच्याजवळून 8 लाख 68 हजार 165 रुपये किमतीचा ऐवज जप्त करण्यात आला आहे. जिल्हा पोलीसप्रमुख डॉ. भीमाशंकर गुळेद यांनी बुधवारी पत्रकारांना ही माहिती दिली. पोलिसांनी अटक केलेल्या पाच जणांपैकी एक अल्पवयीन मुलगा आहे. अटकेची प्रक्रिया पूर्ण करून चौघा जणांना सौंदत्ती येथील न्यायालयासमोर हजर करण्यात आले आहे. न्यायालयाच्या आदेशावरून त्यांची रवानगी न्यायालयीन कोठडीत करण्यात आली आहे. महम्मद इमामसाब कल्लेद, रा. शांतीनगर, सौंदत्ती, मुत्तण्णा यल्लाप्पा गुत्तेदार ऊर्फ गवंडी, रा. लिंगसूर, जि. रायचूर, लालसाब दावलसाब रामपूर, रा. तोग्गलडोणी, ता. कुष्टगी, जि. कोप्पळ, इब्राहिम अकबर कुडची, रा. शांतीनगर, सौंदत्ती अशी अटक करण्यात आलेल्या चौघा जणांची नावे आहेत.

बैलहोंगलचे पोलीस उपअधीक्षक रवी नायक यांच्या मार्गदर्शनाखाली सौंदत्तीचे पोलीस निरीक्षक डी. एस. धर्मट्टी, उपनिरीक्षक आनंद क्यारकट्टी व त्यांच्या सहकाऱ्यांनी ही कारवाई केली आहे. अटक करण्यात आलेल्या टोळीकडून 58 ग्रॅम 260 मिलीची सोन्याची चेन, 35 ग्रॅम 100 मिलीचे सोन्याचे कडे, 2 ग्रॅम 100 मिलीचे लॉकेट, दरोड्यासाठी वापरण्यात आलेली टमटम ऑटोरिक्षा, एक मोटारसायकल, चार मोबाईल संच असा 8 लाख 68 हजार 165 रुपये किमतीचा ऐवज जप्त करण्यात आला आहे. 24 ऑगस्ट 2023 रोजी रात्री 9.45 वाजण्याच्या सुमारास सौंदत्तीजवळील संगप्पनकोळ्ळा परिसरात मोटारसायकलवरून जाणाऱ्या अशोक बसाप्पा बागेवाडी, रा. सौंदत्ती याला अडवून जांबियाचा धाक दाखवून रॉडने हल्ला करण्यात आला होता. हल्ल्यानंतर त्या टोळीने त्याच्या अंगावरील दागिने पळविले होते. चार महिन्यांनंतर या प्रकरणाचा छडा लावण्यात पोलिसांना यश आले आहे.