न्यायालयाकडून केजरीवालांना मोठा झटका
17 फेब्रुवारी रोजी हजर राहण्याचा आदेश
वृत्तसंस्था/ नवी दिल्ली
दिल्लीचे मुख्यमंत्री आणि आम आदमी पक्षाचे संयोजक अरविंद केजरीवाल यांना मोठा झटका बसला आहे. ईडीने वारंवार समन्स बजावूनही हजर राहिल्याप्रकरणी न्यायालयाने केजरीवालांना सुनावणीस उपस्थित राहण्यास सांगितले आहे. केजरीवालांना 17 फेब्रुवारी रोजी न्यायालयात हजर रहावे लागणार आहे.
दिल्ली अबकारी घोटाळ्याप्रकरणी ईडीकडून 5 समन्स बजावण्यात आल्यावरही केजरीवाल हे उपस्थित झाले नव्हते. याप्रकरणी ईडीकडून न्यायालयात याचिका दाखल करण्यात आली होती. या याचिकेवर सुनावणी करत राउज अॅव्हेन्यू न्यायालयाने बुधवारी केजरीवालांना 17 फेब्रुवारी रोजी हजर राहण्यासाठी समन्स बजावला आहे.
दिल्ली अबकारी घोटाळ्याप्रकरणी ईडी केजरीवाल यांची चौकशी करू इच्छिते. याप्रकरणी केजरीवालांचा जबाब नोंदवून घ्यायचा असल्याचे ईडीचे सांगणे आहे. याकरता केजरीवालांना पाच समन्स बजावण्यात आले आहेत. परंतु केजरीवालांनी या समन्सला अवैध आणि राजकारणाने प्रेरित ठरवत फेटाळले होते आणि ईडीसमोर हजर होणे टाळले होते. ईडीने 2 फेब्रुवारी रोजी पाचवा समन्स जारी केला होता, तरीही केजरीवाल तपास यंत्रणेसमोर हजर राहिले नव्हते. यामुळे ईडीने न्यायालयात धाव घेतली होती. दिल्ली अबकारी घोटाळ्याप्रकरणीच आप नेते मनीष सिसोदिया आणि संजय सिंह यांना अटक झाली होती.