रशियन प्रेयसीसोबत विवाह करणार 92 वर्षीय मर्डोक
पाचव्यांदा बोहल्यावर चढणार अब्जाधीश
वृत्तसंस्था/ न्यूयॉर्क
रुपर्ट मर्डोक यांनी प्रेयसी एलेना झुकोव्हासोबत एंगेजमेंट केली आहे. 92 वर्षीय रुपर्ट मर्डोक हे पाचव्यांदा विवाहबद्ध होणार आहेत. कॅलिफोर्नियातील मर्डोक यांची वाइनयार्ड मोरागा येथे हा विवाहसोहळा होईल. रुपर्ट मर्डोक यांनी फॉक्स आणि न्यूज कॉर्पचे अध्यक्षपद सोडल्याच्या काही महिन्यांनी ही घोषणा करण्यात आली आहे.
97 वर्षीय ऐलेना झुकोव्हा ही रशियातील मॉस्कोची रहिवासी आहे. ती मॉलिक्यूलर बायोलॉजिस्ट राहिली आहे. ऐलेनाने रुपर्ट मर्डोक यांना मागील वर्षापासून डेट करण्यास सुरु केले होते. दोघांची भेट मर्डोक यांची तिसरी पत्नी वेंडी डेंगच्या माध्यमातून झाली होती.
रुपर्ट यांचा चौथा विवाह अभिनेत्री आणि मॉडेल जेरी हॉलसोबत झाला होता. 6 वर्षांनी म्हणजेच 2022 मध्ये दोघांनी घटस्फोट घेतला होता. तर मर्डोक यांच्या पूर्वाश्रमीच्या पत्नींमध्ये ऑस्ट्रेलियन फ्लाइट अटेंडेंट पेट्रीसिया बुकर, स्कॉटिश वंशाच्या पत्रकार अन्ना मान, मिस डेंग आणि अमेरिकन मॉडेल जेरी हॉल यांचा समावेश आहे.
मर्डोक यांनी 1950 च्या दशकात ऑस्ट्रेलियात स्वत:च्या कारकीर्दीला सुरुवात केली होती. माध्यम क्षेत्रातील सर्वात प्रभावशाली, यशस्वी आणि वादग्रस्त व्यक्तिमत्त्व म्हणून त्यांना ओळखले जाते. मर्डोक यांना स्वत:च्या वडिलांकडून एक छोटेसे ऑस्ट्रेलियन वृत्तपत्र वारशादाखल मिळाले होते. त्यांनी या वृत्तपत्राचा विस्तार करत टेलिव्हिजनच्या क्षेत्रात पाऊल ठेवले होते. मर्डोक यांनी 1960 च्या दशकात ब्रिटनमध्ये दाखल होत न्यूज ऑफ द वर्ल्ड आणि द सन यासारख्या वृत्तपत्रांची मालकी मिळविली होती.