घर खरेदीवर 4 कोटीची कार मोफत

घरखरेदीदाराला मिळणार लॅम्बोर्गिनी

नोएडामध्ये एका लक्झरी हाउसिंग प्रोजेक्टमध्ये कथित स्वरुपात खरेदीदारांना 26 कोटी रुपयांच्या घर खरेदीवर एक लेम्बोर्गिनी मोफत दिली जात आहे. ग्रेटर नोएडा क्षेत्रात घराचा शोध घेणाऱ्या आणि लक्झरी कारच्या इच्छुकांना आकर्षित करण्यासाठी एका समुहाने अनोखी ऑफर सादर केली आहे.

रियल्टर गौरव गुप्ता यांनी एक्सवर पोस्ट करत या ऑफरकडे लोकांचे लक्ष वेधले आहे. समुहाच्या प्रत्येक व्हिलाची किंमत 26 कोटी रुपयांहून अधिक आहे. नोएडात 26 कोटी रुपयांच्या खर्चातून एक नवा व्हिला प्रोजेक्ट येत असून यात प्रत्येक व्हिलासोबत एक लेम्बोर्गिनी दिली जात असल्याचे गुप्ता यांनी नमूद केले आहे.

प्रत्येक व्हिलासोबत खरेदीदाराला एक लेम्बोर्गिनी उरुस देण्यात येणार असल्याचे समूहाकडून जाहीर करण्यात आले आहे. तर 26 कोटी रुपयांच्या व्हिला खर्चात अन्य शुल्क सामील नाहीत. कार पार्किंगसाठी खरेदीदाराला आणखी 30 लाख रुपये तर पॉवर बॅकअपसाठी 7.5 लाख रुपये खर्च करावे लागणार आहेत. गोल्फ फेसिंग व्हिला खरेदी केल्यास ग्राहकाला आणखी 50 लाख रुपये खर्च करावे लागतील. तर क्लबचे सदस्यत्व इच्छिणाऱ्यांना याकरता 7.5 लाख रुपये खर्च करावे लागणार आहेत. या ऑफरवर लोकांकडून संमिश्र प्रतिक्रिया प्राप्त होत आहेत.

कारची किंमत सुमारे 4 कोटी

लेम्बॉर्गिनी उरुस कारची किंमत 4 कोटी रुपयांहून अधिक आहे. ही कार प्रीमियम श्रेणीतीली आहे. संबंधित समुह एक प्रीमियम रियल इस्टेट आणि हॉस्पिटॅलिटी डिव्हिजन आहे. या समुहाकडून अत्यंत आलिशान प्रकल्प उभारण्यात आले आहेत.