गुरुवारी चन्नम्मानगरात 25 भटक्या कुत्र्यांचे लसीकरण

बेळगाव : शहर व उपनगरातील भटक्या कुत्र्यांना टोचण्यात येणारी अँटीरेबीज लसीकरण मोहीम महापालिका आणि पशुसंगोपन खात्याकडून आणखी तीव्र करण्यात आली आहे. गुरुवारी चन्नम्मानगर व परिसरातील 25 भटक्या कुत्र्यांना लस टोचण्यात आली. भटक्या कुत्र्यांकडून नागरिकांवर हल्ले होण्याच्या घटना वाढल्या आहेत. अलीकडेच मारुतीनगर येथे एका चिमुरडीचा कुत्र्याने चावा घेतल्याने ती गंभीर जखमी झाली होती. यानंतर महापालिकेला जाग आली आहे. सध्या कुत्र्यांची निर्बीजीकरण मोहीम थंडावली असून केवळ भटक्या कुत्र्यांना अँटेरेबीज लस टोचण्यावर अधिक लक्ष केंद्रित करण्यात आले आहे. बुधवारी कॅम्प परिसरात लसीकरण मोहीम राबविण्यात आली. तर गुरुवारी चन्नम्मानगर परिसरात लसीकरण मोहीम यशस्वी करण्यात आली.