चीनमधील आगीत 12 जणांचा मृत्यू

निवासी इमारतीत भीषण अग्नितांडव

वृत्तसंस्था/ बीजिंग

दक्षिण चीनमधील एका निवासी इमारतीला लागलेल्या आगीत 12 जणांचा मृत्यू झाला आहे. ग्वांगडोंग प्रांतातील शांतौ येथील चार मजली इमारतीत आग लागल्याने ही दुर्घटना घडल्याचे स्थानिक अग्निशमन विभागाने सांगितले. या अग्नितांडवात प्रचंड हानीही झाली आहे. मदत व बचावकार्य राबविण्यासोबतच आगीच्या कारणाचा तपास केला जात असल्याचेही सांगण्यात आले. बुधवारी सकाळी जारी करण्यात आलेल्या प्राथमिक अहवालात आठ जणांचा मृत्यू झाला आणि चार जखमींना रुग्णालयात नेण्यात आले असे म्हटले होते. नंतर राज्य माध्यम आउटलेट शिन्हुआने एकूण 12 जणांचा मृत्यू झाल्याचे जाहीर केले. गेल्या महिन्यात हाँगकाँगच्या शेजारील ग्वांगडोंगमध्ये अनेक उंच इमारतींना लागलेल्या भीषण आगीनंतर ही घटना घडली आहे. गेल्या महिन्यात हाँगकाँगमध्ये लागलेल्या आगीनंतर चीनने उंच इमारतींमध्ये आगीच्या धोक्यांविरुद्ध मोहीम सुरू केल्यानंतरची ही पहिलीच मोठी दुर्घटना आहे.