जपानला हरवून इराक बाद फेरीत

वृत्तसंस्था/ डोहा (कतार)

येथे सुरू असलेल्या आशिया चषक फुटबॉल स्पर्धेत इराकने जपानचा पराभव करत बाद फेरीत प्रवेश मिळविला. इराकने 2007 साली ही स्पर्धा जिंकली होती. आता या सामन्यातील विजयामुळे इराकने ड गटात आघाडीचे स्थान मिळवत बाद फेरीतील स्थान पक्के केले आहे.

इराक आणि जपान यांच्यातील सामन्यात इराकने जपानचा 2-1 अशा गोलफरकाने पराभव केला. या सामन्यात इराकचे दोन्ही गोल आयमेन हुसेनने नोंदवले. हुसेनचे हे दोन्ही गोल सामन्याच्या पूर्वार्धात झाले. जपानतर्फे एकमेव गोल दुखापतीच्या कालावधीत इंडोने हेडरद्वारे केला. या पराभवामुळे ड गटात जपान दुसऱ्या स्थानावर राहिला. जपानने यापूर्वी ही स्पर्धा चारवेळा जिंकली होती. क गटातील एका सामन्यात इराणने हाँगकाँगचा 1-0 असा पराभव करत शेवटच्या 16 संघात स्थान मिळवले. या सामन्यात इराणचा एकमेव गोल मेहदी गाएदीने 55 व्या मिनिटाला नोंदवला. या विजयामुळे इराणचा संघ क गटात आघाडीवर असून संयुक्त अरब अमिरात दुसऱ्या स्थानावर आहे. हाँगकाँगला मात्र या गटात शेवटच्या स्थानावर समाधान मानावे लागत आहे.