यूमुम्बा, हरियाणा स्टीलर्स विजयी

वृत्तसंस्था / नोयडा

2024 च्या प्रो कबड्डी लीग स्पर्धेतील येथे झालेल्या अटीतटीच्या सामन्यात यू मुम्बाने यूपी योद्धाजचा 35-33 अशा केवळ दोन गुणांच्या फरकाने पराभव केला. तर दुसऱ्या एका सामन्यात हरियाणा स्टिलर्सने गुजरात जायंटस्चा 39-23 असा पराभव केला.

यू मुम्बा आणि यूपी योद्धाज यांच्यातील सामन्यात यू मुम्बा संघातील खेळाडूंनी आक्रमक चढायांवर अधिक भर दिला होता. सामन्याच्या पूर्वार्धात यूपी योद्धाजच्या कबड्डीपटूंनी आक्रमकता आणि बचावाचा पवित्रा यांच्यात योग्य ताळमेळ राखत यू मुम्बावर आघाडी मिळविली होती. सामन्यातील 14 व्या मिनिटाला यूपी योद्धाजने यू मुम्बाचे सर्व गडी बाद केले. शिवम चौधरी, हुडा यांचा दमदार खेळ झाला. यू मुम्बा संघाने सामन्याच्या पूर्वार्धात यूपी योद्धाजचे सर्व गडी बाद केले. त्यामुळे मध्यंतरापर्यंत यूपी योद्धाजने मिळविलेली आघाडी यू मुम्बाने खूपच कमी केली. यू मुम्बाच्या खेळाडूंनी यूपी योद्धाजच्या हुडाला बाद केले. त्यामुळे यूपी योद्धाजने मध्यंतरावेळी यू मुम्बावर 17-16 अशी केवळ एका गुणाची आघाडी मिळविली होती.

सामन्याच्या उत्तरार्धात यू. मुम्बाचे दुसऱ्यांदा सर्व गडी बाद झाले. हुडाच्या आक्रमक चढायांमुळे यूपी योद्धाजला गुण मिळू लागले. यूपी योद्धाजचे शेवटच्या दहा मिनिटांच्या कालावधीत दुसऱ्यांदा सर्व गडी बाद झाल्याने यू मुम्बाने अखेरीस दोन गुणांच्या फरकाने हा सामना जिंकला.

हरियाणा स्टीलर्स आणि गुजरात जायंट्स यांच्यातील सामन्यात मोहम्मदरेझा शदलोई तसेच शिवम पाठारे आणि विनय यांचा खेळ अधिक आक्रमक झाला. राहुलने आपल्या चढायांवर हरियाणा स्टीलर्सला चांगलीच आघाडी मिळवून दिली. स्पर्धेच्या गुणतक्त्यात हरियाणा स्टीलर्सने या विजयामुळे तिसरे स्थान मिळविले आहे.