भरधाव बोलेरोच्या ठोकरीने युवकाचा जागीच मृत्यू

मॉर्निंग वॉकसाठी जाताना अपघात

बेळगाव : मॉर्निंग वॉकसाठी जाताना एका युवकाचा भरधाव गुड्स बोलेरोच्या ठोकरीने मृत्यू झाला आहे. गुरुवारी सकाळी महात्मा फुले रोडवर ही घटना घडली असून वाहतूक दक्षिण विभाग पोलीस स्थानकात या घटनेची नोंद झाली आहे. श्रीधर दिलीप पवार (वय 43) रा. संतसेना रोड असे अपघातात मृत्युमुखी पडलेल्या दुर्दैवी युवकाचे नाव आहे. त्याच्या पश्चात आई, वडील, पत्नी, मुलगा, मुलगी, भाऊ, बहीण असा परिवार आहे. सोमवार दि. 23 सप्टेंबर रोजी रक्षाविसर्जन होणार आहे. वाहतूक दक्षिण विभाग पोलिसांनी घटनास्थळी भेट देऊन पंचनामा केला. श्रीधर गुरुवारी सकाळी  मॉर्निंग वॉकसाठी आपल्या घरातून बाहेर पडले होते. महात्मा फुले रोडवर रस्ता ओलांडताना भरधाव गुड्स बोलेरोची धडक बसून त्यांचा मृत्यू झाला. या अपघातात बोलेरोचालक पारसराम सावळाराम (वय 25) रा. कलमठ रोड हाही जखमी झाला आहे. वाहतूक दक्षिण विभागाचे पोलीस निरीक्षक विनायक बडीगेर पुढील तपास करीत आहेत.