Satara Mahila Congress protest | साताऱ्यात महिला काँग्रेसचा रस्ता रोको; मंत्री पुरींच्या राजीनाम्याची मागणी

                          साताऱ्यात राजकीय वातावरण तापले

सातारा: अमेरिकेतील बहुचर्चित 'एपस्टीन फाईल्स'मध्ये नाव आलेल्या केंद्रीय मंत्र्यांचा पंतप्रधान नरेंद्र मोदी यांनी राजीनामा न घेता त्यांना पाठीशी घालणे, ही देशासाठी शरमेची बाब आहे. या प्रकरणावरून अमेरिकेच्या दबावाखाली येऊन पंतप्रधानांनी केलेले 'ट्रेड डील' म्हणजे देशाच्या हिताचे केलेले सपशेल समर्पण (सरेंडर) आहे, असा घणाघाती आरोप करत आज सातारा जिल्हा महिला काँग्रेसच्या वतीने जिल्हा काँग्रेस भवनसमोर भव्य रस्ता रोको आंदोलन करण्यात आले. या आंदोलनाचे नेतृत्व सातारा जिल्हा महिला काँग्रेसच्या जिल्हाध्यक्षा व सर्व प्रमुख महिला पदाधिकाऱ्यांनी केले. यावेळी आंदोलक महिलांनी केंद्र सरकार आणि पंतप्रधान मोदी यांच्या विरोधात जोरदार घोषणाबाजी केली.

आंदोलनातील मुख्य मुद्दे:
१. एपस्टीन फाईल्स आणि मंत्र्यांचा बचाव: केंद्रीय मंत्री पुरी यांचे नाव एपस्टीन फाईल्समध्ये आले असतानाही त्यांच्यावर कारवाई करण्याऐवजी सरकार त्यांना संरक्षण देत आहे. अशा नैतिक अध:पतन झालेल्या मंत्र्यांनी तात्काळ राजीनामा द्यावा, अशी मागणी महिला काँग्रेसने केली.
२. देशहिताचे समर्पण: एपस्टीन फाईल्सच्या प्रकरणामुळे अमेरिकेने भारतावर दबाव निर्माण केला असून, त्या दबावाखाली येऊन भारताने केलेले नवीन ट्रेड डील हे देशाचे नुकसान करणारे आहे. हे पंतप्रधानांचे केवळ स्वतःच्या मंत्र्यांना वाचवण्यासाठी केलेले 'सरेंडर' आहे.
३. महिलांची सुरक्षा आणि नैतिकता: ज्या मंत्र्यांची नावे अशा गंभीर प्रकरणांत येतात, त्यांना सत्तेत राहण्याचा कोणताही अधिकार नाही. हे सरकार महिला सुरक्षेच्या गप्पा मारते, मात्र प्रत्यक्षात आरोपींना पाठीशी घालते, असा संताप महिला पदाधिकाऱ्यांनी व्यक्त केला.
काँग्रेस भवनसमोर बराच वेळ रस्ता रोको केल्यामुळे वाहतूक विस्कळीत झाली होती. जोपर्यंत संबंधित मंत्र्यांचा राजीनामा घेतला जात नाही, तोपर्यंत काँग्रेसचे हे आंदोलन अधिक तीव्र होईल, असा इशारा यावेळी देण्यात आला.

या आंदोलनात सातारा जिल्हा महिला काँग्रेसच्या जिल्हाध्यक्ष सुषमा राजेघोरपडे,प्रदेश सचिव चंद्रकला नायडू,अनिता जाधव,धनश्री महाडिक , प्राची ताकतोडे, हजारा शिकलगार, शोभा गोळे,सविता शिंदे,अरुणा नाझरे, अँड.नाजनीन, माधवी वरपे, मनिषा कांबळे,अनिता भोसले,कमल हराळे, जस्मिन शैक ,सर्व पदाधिकारी, कार्यकर्त्या आणि काँग्रेसचे विविध सेलचे अध्यक्ष मोठ्या संख्येने उपस्थित होते.