लग्नानंतरही दोन बॉयफ्रेंड; प्रियकरांच्या साथीने नवऱ्याला संपवलं आणि गावाबाहेरच्या तलावात फेकलं....पोलिसांना मिळाला क्लू अन् उघडं झालं सगळं कांड
गुम्माडी काशिराम (वय २६, रा. हानमाजीपेट, बांसवाडा मंडळ, कामारेड्डी जिल्हा) असे मृत तरुणाचे नाव आहे. तो मजुरीचे काम करून कुटुंबाचा उदरनिर्वाह करत होता. २३ ऑक्टोबर २०२६ रोजी रात्री गावाच्या हद्दीतील पचेरा चेरुवू तलावात त्याचा मृतदेह आढळून आला. या घटनेमुळे परिसरात खळबळ उडाली होती.
सुरुवातीला काशिरामचा तलावात बुडून मृत्यू झाल्याचा संशय व्यक्त करण्यात आला. त्याचे वडील चकाली भुमैया यांनी दिलेल्या तक्रारीनंतर पोलिसांनी आकस्मिक मृत्यूची नोंद करून तपास सुरू केला. मात्र, मृतदेहाची पाहणी करताना पोलिसांना काशिरामच्या गळ्यावर दुखापतीच्या खुणा दिसून आल्या. त्यामुळे मृत्यूबाबत संशय निर्माण झाला.
शवविच्छेदन अहवालाने उघड केले हत्येचे रहस्य
पोलिसांनी मृतदेहाचे शवविच्छेदन करून अहवाल मागवला. या अहवालात काशिरामचा मृत्यू गळा आवळल्यामुळे झाल्याचे स्पष्ट झाले. त्यामुळे हा अपघाती मृत्यू नसून हत्या असल्याचा निष्कर्ष समोर आला. त्यानंतर पोलिसांनी तपासाची दिशा बदलून हत्येचा गुन्हा दाखल केला आणि मृताच्या कुटुंबीयांसह संबंधित व्यक्तींची चौकशी सुरू केली.
बांसवाडा विभागाचे उपअधीक्षक बी. विठ्ठल रेड्डी यांनी दिलेल्या माहितीनुसार, तपासादरम्यान काशिरामची पत्नी गुम्माडी सविता (वय २५) हिचे गावातील दोन तरुणांशी जवळचे संबंध असल्याची माहिती समोर आली. चिंताकिंडी रामू (वय २६) आणि पसुपूला संतोष (वय २५) अशी या दोघांची नावे आहेत. पत्नीच्या या संबंधांना काशिरामचा विरोध होता. त्यातून पती-पत्नीमध्ये वाद होत असल्याचेही तपासात उघड झाल्याचे पोलिसांनी सांगितले.
दारू पाजण्याच्या बहाण्याने तलाव परिसरात नेले
पोलिसांच्या माहितीनुसार, काशिरामचा कायमचा अडथळा दूर करण्याच्या उद्देशाने सविताने रामू आणि संतोष यांच्या मदतीने हत्येचा कट रचल्याचा आरोप आहे. २३ ऑक्टोबरच्या रात्री काशिरामला दारू पाजण्याच्या बहाण्याने गावाबाहेरील तलाव परिसरात नेण्यात आले.
काशिराम नशेत असताना रामूने नायलॉनच्या दोरीने त्याचा गळा आवळल्याचा आरोप आहे. त्याचवेळी संतोषने काशिरामचे दोन्ही हात पकडून ठेवल्याचे तपासात समोर आल्याचे पोलिसांनी सांगितले. या प्रकारात काशिरामचा मृत्यू झाल्यानंतर तिघांनी मृतदेह तलावात फेकून दिला. त्याचा मृत्यू पाण्यात बुडून झाल्याचे भासवून हत्येचा पुरावा लपविण्याचा प्रयत्न करण्यात आल्याचा संशय पोलिसांनी व्यक्त केला आहे.
तांत्रिक पुराव्यांच्या आधारे तिघांना अटक
प्रकरणाचा तपास करताना पोलिसांनी तांत्रिक पुरावे, उपलब्ध माहिती आणि संशयितांची चौकशी यांचा आधार घेतला. त्यानंतर ३० ऑक्टोबर रोजी काशिरामची पत्नी सविता, रामू आणि संतोष या तिघांना अटक करण्यात आली. पोलिसांनी त्यांच्याकडून मोबाईल फोन आणि गुन्ह्याशी संबंधित अन्य साहित्य जप्त केले आहे.
तिन्ही आरोपींविरोधात भारतीय न्याय संहितेतील संबंधित कलमांनुसार गुन्हा दाखल करण्यात आला आहे. त्यांना न्यायालयात हजर केले असता न्यायालयाने न्यायालयीन कोठडी सुनावली. या प्रकरणाचा पुढील तपास पोलिसांकडून सुरू आहे.
तलावात मृतदेह आढळल्यानंतर सुरुवातीला अपघाती मृत्यूची शक्यता व्यक्त होत असताना शवविच्छेदन अहवाल आणि पोलिस तपासामुळे या घटनेमागील कथित कट उघडकीस आला. या प्रकरणामुळे कामारेड्डी जिल्ह्यात खळबळ उडाली आहे.
