‘डब्लूइएफ’चे अध्यक्ष बोर्गे ब्रेंडे यांचा राजीनामा

एपस्टीनशी संबंध जोडल्यानंतर ब्रेंडे यांनी घेतला निर्णय

वृत्तसंस्था/ नवी दिल्ली

वर्ल्ड इकॉनॉमिक फोरम (डब्लूइएफ) चे अध्यक्ष आणि सीईओ बोर्गे ब्रेंडे यांनी राजीनामा दिला आहे. जिनेव्हा येथील संस्थेने लैंगिक गुन्हेगार जेफ्री एपस्टीनशी असलेल्या त्यांच्या संबंधांची चौकशी सुरू केल्यानंतर काही आठवड्यांनंतरच त्यांचा हा निर्णय आला आहे. ब्रेंडे 2017 पासून डब्लूइएफचे नेतृत्व करत होते. सध्या, स्वित्झर्लंड येथील संस्थेने त्यांच्या राजीनाम्याची पुष्टी केली आहे आणि अलोइस झ्विंगी यांना अंतरिम भूमिकेत नियुक्त केले आहे.

अमेरिकेच्या न्याय विभागाच्या अहवालानंतर तपास सुरू झाला. रॉयटर्सच्या वृत्तानुसार, अमेरिकन न्याय विभागाच्या कागदपत्रांवरून असे दिसून आले आहे की ब्रेंडे यांनी एपस्टीनसोबत तीन व्यावसायिक डिनरमध्ये भाग घेतला होता. त्यांनी ईमेल आणि टेक्स्ट मेसेजद्वारे देखील संवाद साधला होता. या खुलाशांनंतर, जिनेव्हा येथील संस्थेने ब्रेंडेच्या मागील संपर्कांची स्वतंत्र चौकशी सुरू केली.

इकॉनॉमिक फोरम व एपस्टीन वाद

वर्ल्ड इकॉनॉमिक फोरम दरवर्षी स्वित्झर्लंडमधील दावोस येथे एक शिखर परिषद आयोजित करते, ज्यामध्ये जगभरातील राजकारणी, अब्जाधीश आणि व्यावसायिक नेते उपस्थित राहतात. जेफ्री एपस्टीन हा लैंगिक गुह्यांसाठी दोषी ठरलेला एक अमेरिकन वित्तपुरवठादार होता आणि 2019 मध्ये तुरुंगात त्याचा मृत्यू झाला.