पर्यटकांना लुबाडणाऱ्या हॉटेलांचे परवाने निलंबित करू
मुख्यमंत्री डॉ. प्रमोद सावंत यांचा हॉटेल व्यावसायिकांना इशारा
पणजी : राज्यात नववर्ष व नाताळ सणाची धामधूम सुरू आहे. अशातच पर्यटक गोव्याच्या दिशेने आनंद लुटण्यासाठी मोठ्या संख्येने येत आहेत. जर एखाद्या हॉटेल व्यावसायिकांकडून पर्यटकांची लुबाडणूक होत असल्याचे निदर्शनास आल्यास त्यांच्या व्यवसायाचा परवाना सहा महिन्यांसाठी निलंबित करून त्यांच्यावर कठोर कारवाई केली जाईल, असा इशारा मुख्यमंत्री डॉ. प्रमोद सावंत यांनी दिला आहे. पर्वरी येथील मंत्रालयाच्या सभागृहात घेण्यात आलेल्या पत्रकार परिषदेत त्यांनी हा इशारा दिला. मुख्यमंत्री म्हणाले, पर्यटकांना उत्तम सोयी-सुविधा पुरवणे हे प्रत्येक हॉटेल व्यावसायिकाचे कर्तव्य आहे. यामध्ये हलगर्जीपणा झाल्यास आणि पर्यटकांची फसवणूक झाल्यास त्याचे गंभीर परिणाम हॉटेल व्यावसायिकांना भोगावे लागणार आहेत. वाहतूक नियमांचे पालन करणे हे प्रत्येकाचे कर्तव्य आहे. पर्यटकांकडून वाहतूक नियमांचे उल्लंघन झाल्यास त्यांच्यावर वाहतूक पोलीस कारवाई करतील.
डान्सबारवर बंदी आणणार
राज्यात जर कुणी बेकायदेशीर डान्सबार चालवत असेल तर त्यांची गय केली जाणार नाही. कारण डान्सबारच्या नावाखाली अवैध व्यवसाय करण्यात अनेकजण धन्यता मानतात आणि त्यामुळे पर्यटक तसेच राज्यातील जनतेलाही नाहक त्रासाला सामोरे जावे लागते. अशा गैरकृत्यांची पोलिसांत तक्रार झाल्यानंतर डान्सबारवर कायमस्वऊपी बंदी आणण्यात येईल, अशी माहिती मुख्यमंत्री सावंत यांनी दिली.