मनपाने पाठविलेल्या मतदारयाद्या आल्या परत

बेळगाव : महानगरपालिकेकडून मतदारयाद्या तयार केल्या जात आहेत. या मतदारयाद्या जिल्हाधिकारी कार्यालयाकडे पाठविल्या होत्या. परंतु, मतदारयाद्यांवर शिक्का नसल्याने पुन्हा महापालिकेमध्ये द्याव्या लागल्या. यामुळे कर्मचाऱ्यांना विनाकारण हेलपाटे मारावे लागले. महापालिकेकडून मतदारयाद्या तयार केल्या जात असतात. नवीन मतदारांची नोंद झाल्यानंतर त्याप्रमाणे नवीन यादी तयार करून ती जिल्हाधिकारी कार्यालयाकडे पाठवली जाते. अशाप्रकारे सोमवारी मनपाने मतदारयाद्या जिल्हाधिकारी कार्यालयाकडे पाठवल्या होत्या. तपासणीला सुरुवात केल्यानंतर त्यावर मनपाचा शिक्का नसल्याचे निदर्शनास आले. त्यामुळे या मतदारयाद्या पुन्हा मनपाकडे पाठविण्यात आल्या.