वेर्ले ग्रामस्थांचा बीएसएनएल अधिकाऱ्यांना घेराव

सावंतवाडी प्रतिनिधी

सावंतवाडी तालुक्यातील वेर्ले ,कलंबिस्त, सांगेली ,शिरशिंगे ,सावरवाड पंचक्रोशीत दूरसंचार विभागाचे तीन टॉवर्स आहेत. पण दूरसंचारचे मोबाईल नेटवर्कच नसल्याने आम्ही मोबाईलचे रिचार्ज मारायचे कशाला ? नेटवर्क मिळत नसेल तर आता दूरसंचारचे सिम हवे कशाला अशी भूमिका या पंचक्रोशीतील दूरसंचार ग्राहकांनी घेत दूरसंचारच्या सेवेबद्दल नाराजी व्यक्त केली . दूरसंचार सेवेच्या सावळ्या गोंधळाबाबत वेर्ले गावातील ग्रामस्थ एकवटत मंगळवारी सावंतवाडी येथील दूरसंचार विभागाच्या अधिकाऱ्यांना घेराव घातला . येत्या आठ दिवसात मोबाईल सेवा सुरळित न झाल्यास पंचक्रोशीतील सर्व टॉवर ग्रामस्थ बंद पाडतील. तसेच सिम कार्ड दूरसंचार कार्यालयाकडे जमा करण्याचा इशारा ग्रामस्थांनी देताच दूरसंचार विभागाचे अधिकारी मनोज मातुर व मंडल अधिकारी एन एस गायकवाड यांनी येत्या 25 जुलैला वेर्ले गावात जाऊन मोबाईल टॉवरची पाहणी केली जाईल असे आश्वासन दिले . यावेळी उपसरपंच मोहन राऊळ, सामाजिक कार्यकर्ते डॉ संजीव लिंगवत,उद्धव बाळासाहेब ठाकरे शिवसेना पक्षाचे दिलीप राऊळ , माजी उपसरपंच चंद्रकांत राणे , प्रसाद गावडे , नारायण राणे ,राजन राणे ,पुंडलिक कदम यांच्या नेतृत्वाखाली सावंतवाडी दूरसंचार विभागाच्या कार्यालयाला ग्रामस्थांनी धडक दिली .