वेदांताचा व्यवसाय डिमर्जरनंतर पाच भागांमध्ये विभागणार

रचना सुलभ आणि कर्जाचा भार कमी करण्यासाठी प्रयत्न

नवी दिल्ली :

वेदांत लिमिटेडचे कर्जदार पुढील महिन्यात होणाऱ्या बैठकीत कंपनीच्या पुनर्रचना योजनेवर अंतिम निर्णय घेणार आहेत. तसेच या योजनेअंतर्गत, कंपनीला पाच वेगवेगळ्या व्यवसायांमध्ये विभागले जाणार असल्याची माहिती आहे. अशी कारवाई कंपनीची रचना सुलभ करण्यासाठी आणि कर्जाचा भार कमी करण्यासाठीच्या प्रयत्नांचा एक भाग असल्याचेही सांगितले जात आहे. उपलब्ध माहितीनुसार, न्यायालयाच्या आदेशानुसार 18 फेब्रुवारी रोजी ही बैठक होणार आहे, ज्यामध्ये योजनेच्या तपशीलांवर चर्चा केली जाईल. जर कंपनीच्या कर्जदारांनी प्रस्तावाला मान्यता दिली तर ती मंजुरीसाठी शेअरहोल्डर्सकडे पाठवली जाणार आहे.

वेदांत लिमिटेडने 2023 च्या अखेरीस त्यांची पुनर्रचना योजना जाहीर केली होती. या योजनेअंतर्गत अॅल्युमिनियम, तेल आणि वायू, वीज आणि स्टील सारख्या व्यवसायांना स्वतंत्र कंपन्या म्हणून सूचीबद्ध केले जाऊ शकते. कंपनीचे मूल्यांकन सुधारणे आणि तिच्या मूळ कंपनी, वेदांत रिसोर्सेसवरील वाढते कर्ज कमी करणे हे या उपक्रमाचे उद्दिष्ट आहे.

स्वतंत्र युनिट्समध्ये विभाजन करणार

गेल्या वर्षी, वेदांताच्या 75 टक्के सुरक्षित कर्जदारांनी एका योजनेला मंजुरी दिली. आता, कंपनीने आपला व्यवसाय स्वतंत्र युनिट्समध्ये विभागण्याची योजना आखली आहे. कंपनी अॅल्युमिनियम, तेल आणि वायू, वीज, स्टील आणि सेमीकंडक्टर सारख्या क्षेत्रांवर लक्ष केंद्रित करेल. सेमीकंडक्टर युनिट कंपनीच्या इलेक्ट्रॉनिक्स आणि तांबे मालमत्तेच्या विद्यमान व्यवसायांसोबत ठेवले जाणार असल्याचे संकेतही आहेत.

वेदांतचा शेअर वधारला

आज, वेदांत लिमिटेडच्या शेअरमध्ये वाढ झाली आहे. दुपारी 2 वाजताच्या सुमारास, कंपनीचे शेअर्स 0.95 टक्के किंवा 4.10 ने वाढून 434.70 वर पोहोचले. गेल्या 12 महिन्यांत कंपनीचे शेअर्स 50 टक्क्यांहून अधिक वाढले आहेत, ज्यामुळे कंपनीचे बाजार मूल्य जवळजवळ 19 अब्ज डॉलर झाले आहे.