अवैध शैलीमुळे अमेरिकेची गोलंदाज इसानी वाघेला निलंबित

वृत्तसंस्था/ दुबई

अमेरिकेची महिला गोलंदाज इसानी वाघेलाला गोलंदाजीची शैली अवैध असल्याचे स्पष्ट झाल्यानंतर आयसीसीने तिच्यावर गोलंदाजी करण्यास निर्बंधित केले आहे.

नेपाळमध्ये झालेल्या आयसीसी महिला टी-20 विश्वचषक पात्रता 2026 मध्ये आयर्लंडविरुद्ध अमेरिकेच्या सामन्यादरम्यान सामना अधिकाऱ्यांच्या अहवालानंतर हा निर्णय घेण्यात आला. आयसीसी इव्हेंट पॅनेलने वाघेलाच्या त्यानंतरच्या सामन्यातील फुटेजची तपासणी केली आणि असा निष्कर्ष काढला की तिची गोलंदाजीची शैली नियमांचे उल्लंघन करणारी आहे. त्यामुळे नियमांच्या कलम 6.7 नुसार, तिला आंतरराष्ट्रीय क्रिकेटमध्ये गोलंदाजी करण्यापासून निलंबित करण्यात आले आहे, असे आयसीसीच्या निवेदनात म्हटले आहे. तिच्या गोलंदाजीचे  पुनर्मूल्यांकन होईपर्यंत हे निलंबन कायम राहणार आहे. अमेरिकेच्या या सीम गोलंदाजाचे निलंबन तात्काळ लागू झाले आहे आणि पुनर्मूल्यांकन पूर्ण होईपर्यंत तिला सर्व आंतरराष्ट्रीय सामन्यांमध्ये गोलंदाजी करता येणार नाही. महिला क्रिकेटमध्ये निष्पक्षता आणि सचोटी सुनिश्चित करण्यासाठी आयसीसीच्या सुरू असलेल्या प्रयत्नांना हे पाऊल अधोरेखित करते, असे  सांगण्यात आले.