ज्येष्ठ अभिनेत्यांसोबत काम करण्याची उर्वशीची तयारी

चित्रपटाला होणार लाभ

अभिनेत्री उर्वशी रौतेला चित्रपटांसोबत वैयक्तिक आयुष्यावरूनही चर्चेत असते. ती सोशल मीडियावर अत्यंत सक्रीय आहे. उर्वशीने अलिकडेच सिंह साहब द ग्रेट या चित्रपटात तुलनेत अधिक वयाचे अभिनेते सनी देओलसोबत काम करण्यावरून अनुभव व्यक्त केला आहे. मोठ्या वयाच्या अभिनेत्यासोबत काम करण्यास मला कुठलाच त्रास नसल्याचे तिने म्हटले आहे.

चित्रपटांमधील कलाकारांच्या वयात मोठा फरक असल्याने कुठलीच समस्या उद्भवत नाही. कारण याचा अर्थ मोठ्या संख्येत चाहते असलेल्या प्रस्थापित कलाकारांसोबत काम करणे होतो. परंतु प्रत्यक्ष आयुष्यात मी कुठल्याही अधिक वयाच्या पुरुषाला डेट करणार नाही असे तिने सांगितले आहे. सनी देओल आणि उर्वशी यांच्या वयात 38 वर्षांचे अंतर आहे. उर्वशी ही सनी देओलच्या मुलांपेक्षाही कमी वयाची आहे.

कुठलीच समस्या नसल्याचे दिग्दर्शकाला वाटत असेल तर मलाही ते चालणारे आहे. मी आता बालकृष्ण गारू यांच्यासोबत काम करत आहे. आम्हा दोघांच्या वयामधील अंतर हे त्याहून अधिक आहे. वयामध्ये जितके अंतर असेल तितकाच चित्रपटाला लाभ होणार आहे.  स्टार जितका मोठा असेल, तितकेच त्याचे चाहते अधिक असणार आहेत.  यामुळे चित्रपटालाच लाभ होत असतो असे उर्वशीने म्हटले आहे.