युपी योद्धाजची पाटणा पायरेट्सवर मात

वृत्तसंस्था / नोएडा

2024 च्या प्रो कबड्डी लीग स्पर्धेतील खेळविण्यात आलेल्या सामन्यात युवा रायडर्स, भवानी रजपूत आणि गगन गौडा यांच्या शानदार कामगिरीच्या जोरावर युपी योद्धाजने पाटणा पायरेटसचा 44-42 अशा केवळ दोन गुणांच्या फरकाने निसटता पराभव केला.

हा सामना शेवटच्या क्षणापर्यंत अटितटीचा राहिला. युपी योद्धाज संघातील देवांक दलालने 18 गुण तर अयान लोचाबने सुपर 10 गुण नोंदविले. सामन्याच्या पूर्वाधार्थ पाटणा पायरेटस संघाने युपी योद्धाजच्या तुलनेत अधिक दर्जेदार खेळ केला. सुरुवातीला युपी योद्धाज संघ पिछाडीवर होता. गगन गौडाच्या सुपर चढाईमुळे सामन्याला कलाटणी मिळाली. पहिल्या 10 मिनिटांत देवांक दलालने सामन्यावर आपली पकड मजबूत राखली होती. त्याने आपल्या चढायांवर पाच गुण मिळविले होते. 14 व्या मिनिटाला युपी योद्धाजचे सर्वगडी पाटणा पायरेटसने बाद करुन सामन्याला कलाटणी दिली. यावेळी पाटणा पायरेटसने 6 गुणांची आघाडी मिळविली होती. त्यानंतर देवांक दलालच्या सुपर 10 गुणामुळे युपी योद्धाजने मध्यंतरावेळी पाटणा पायरेटसवर 25-21 अशी 4 गुणांची आघाडी मिळविली. सामन्याच्या उत्तराधार्थ दोन्ही संघाने आपल्या चढायांवर गुण वसुल केले. गगनच्या सुपर चढाईमध्ये दीपक, गुरुदीप आणि अंकित हे बाद झाले. त्यानंतर गगनने सुपर 10 गुण घेतल्याने हा सामना यावेळी बरोबरीत राहिला होता. शेवटच्या दोन मिनिटांमध्ये भवानी आणि गगन गौडा यांच्या शानदार चढायांमुळे युपी योद्धाजने पाटणा पायरेटसचा 44-42 अशा दोन गुणांच्या फरकाने पराभव केला.