दोन पाकिस्तानींचा पंजाब सीमेवर खात्मा

घुसखोरीचा कट उधळला : तरनतारनमध्ये बीएसएफची कारवाई

वृत्तसंस्था/ तरनतारन

भारतीय सीमेवर तैनात असलेल्या सीमा सुरक्षा दलाच्या (बीएसएफ) जवानांनी गुरुवारी रात्री उशिरा दोन पाकिस्तानी तस्करांना ठार केले. सीमेपलीकडून भारतात बेकायदेशीरपणे घुसण्याचा प्रयत्न करणाऱ्या घुसखोरांकडून जप्त केलेल्या मालाबाबत वरिष्ठ अधिकाऱ्यांनी अद्याप कोणतीही माहिती दिलेली नाही. मिळालेल्या माहितीनुसार, ही घटना गुरुवारी मध्यरात्रीनंतर सुमारे साडेबारा वाजता घडली.

मिळालेल्या माहितीनुसार, ही घटना तरनतारन परिसरातील राजोके येथे घडली. सीमेवर पहारा देणाऱ्या जवानांनी काटेरी कुंपणापलीकडील हालचाल पाहिली. अंदाजे तीन संशयित पाकिस्तानी रात्रीच्या अंधाराचा फायदा घेऊन हळूहळू भारतीय सीमेकडे सरकताना दिसले. सुरक्षेच्या कारणास्तव उपस्थित जवानांनी थर्मल इमेजिंग आणि दुर्बिणीच्या साहाय्याने संशयितांच्या हालचालींचा मागोवा घेतला. मात्र, त्यांनी आधीच भारतीय हद्दीत प्रवेश केला होता. जवानांनी संशयितांच्या ठिकाणाची खात्री करून त्यांना परत जाण्याचा इशारा दिला. मात्र, माघार घेण्याऐवजी घुसखोरांनी लपण्याचा प्रयत्न केला. वारंवार इशारा दिल्यानंतर सुरक्षेच्या कारणास्तव बीएसएफच्या जवानांना गोळीबार करावा लागला.

दोन संशयित ठार झाल्याचे स्पष्ट

या कारवाईदरम्यान जवानांनी दोन घुसखोरांना यशस्वीरित्या ठार केले. हे घुसखोर तस्कर असून अवैध माल पोहोचवण्याच्या उद्देशाने भारतीय सीमेत घुसले होते, असा विश्वास व्यक्त केला जात आहे. त्यांच्याकडून माल जप्त झाल्याची अद्याप पुष्टी झालेली नाही. घटनेनंतर लगेचच संपूर्ण परिसर सील करण्यात आला आणि आजूबाजूच्या परिसरात शोधमोहीम सुरू करण्यात आली. मात्र, तिसऱ्या संशयिताचा मागमूस लागू शकला नाही.