अभिनेता अश्विन मुश्रान यांच्या कारची दुचाकीला धडक; पिता-पुत्र जखमी, गोव्यातील अपघातानंतर वादाचा व्हिडिओ चर्चेत

केपे : ‘फॅशन’ आणि ‘लगे रहो मुन्नाभाई’ यांसारख्या चित्रपटांमध्ये काम केलेले अभिनेता अश्विन मुश्रान सध्या गोव्यातील एका अपघातामुळे चर्चेत आले आहेत. कुशावती परिसरातील केपे येथे त्यांच्या कारची दुचाकीला धडक झाल्याचा दावा करण्यात येत आहे. या अपघातात दुचाकीवरील पिता-पुत्र जखमी झाले असून, घटनेनंतर स्थानिकांनी अभिनेता आणि त्यांच्या पत्नीला घेरल्याचा चित्रफितीचा प्रसार सामाजिक माध्यमांवर होत आहे.

ही घटना रविवारी दुपारी साडेबारा वाजण्याच्या सुमारास केपेमधील कुसमन परिसरात घडल्याचे सांगितले जात आहे. जखमी पित्याला गंभीर दुखापत झाली असून, त्याच्यावर रुग्णालयात उपचार सुरू आहेत.

अपघाताच्या कारणावरून वेगवेगळे दावे

घटनास्थळी उपस्थित असलेल्या काही स्थानिकांच्या म्हणण्यानुसार, अश्विन मुश्रान यांची कार चुकीच्या दिशेने येत होती आणि त्यावेळी समोरून येणाऱ्या दुचाकीला धडक झाली. मात्र, अपघात नेमका कसा झाला, याबाबत अद्याप अधिकृतपणे संपूर्ण माहिती समोर आलेली नाही.

स्थानिक नेते अमोल कणेकर यांनी आरोप केला आहे की, अपघातानंतर अभिनेता आणि त्यांची पत्नी रेबेका यांनी जखमींची विचारपूस न करता घटनास्थळ सोडण्याचा प्रयत्न केला. या आरोपांची स्वतंत्रपणे पुष्टी झालेली नाही.

अपघातानंतर घटनास्थळी वाद

समोर आलेल्या चित्रफितीत अश्विन मुश्रान आणि त्यांची पत्नी रेबेका हे स्थानिकांशी वाद घालताना दिसत आहेत. काही स्थानिकांनी त्यांच्याशी जाब विचारल्याचे चित्रफितीत दिसते.

अमोल कणेकर यांनी अपघातातील जखमींच्या स्थितीबाबत गंभीर दावा केला आहे. त्यांच्या म्हणण्यानुसार, दुचाकीस्वाराला गंभीर दुखापत झाली असून, त्याच्या हाडाचा तुकडा मुश्रान यांच्या कारच्या उजव्या बाजूच्या पुढील चाकाच्या भागात अडकला होता. या दाव्याची अधिकृत पुष्टी अद्याप झालेली नाही.

अमोल कणेकर यांनी असा आरोपही केला आहे की, अपघातानंतर माफी मागण्याऐवजी अभिनेता आणि स्थानिकांमध्ये वाद झाला. याच वादादरम्यान अश्विन मुश्रान यांच्या पत्नी रेबेका यांनी आपल्यावर थुंकल्याचा दावा कणेकर यांनी केला आहे.

दरम्यान, या संपूर्ण प्रकरणावर अश्विन मुश्रान यांनी वेगळी भूमिका मांडली असून, घटनेचे चुकीच्या पद्धतीने चित्रण केले जात असल्याचे त्यांनी म्हटले आहे. या प्रकरणावर लवकरच सविस्तर निवेदन देणार असल्याचे त्यांनी सांगितले आहे.

पोलिसांच्या अधिकृत भूमिकेची प्रतीक्षा

या अपघाताबाबत अद्याप पोलिसांकडून अधिकृत सविस्तर भूमिका समोर आलेली नाही. त्यामुळे अपघाताची नेमकी कारणे, वाहनचालकाची चूक आणि त्यानंतर घडलेल्या वादाबाबत अधिकृत तपासातूनच स्पष्टता येणार आहे.

अश्विन मुश्रान हे अभिनेता तसेच वॉइस-ओवर आर्टिस्ट म्हणूनही परिचित आहेत. त्यांनी ‘क्विक गन मुरुगन’, ‘लगे रहो मुन्नाभाई’, ‘फॅशन’, ‘देसी बॉईज’, ‘मैं तेरा हीरो’ आणि ‘शहजादा’ यांसारख्या चित्रपटांमध्ये काम केले आहे. अलीकडे ते ‘हॅप्पी पटेल’ या चित्रपटातही दिसले होते.