मोठ्या हल्ल्यापासून ट्रम्प यांची माघार लष्कराला कारवाया थांबवण्याचे आदेश

► वृत्तसंस्था वॉशिंग्टन
अमेरिकेचे राष्ट्राध्यक्ष डोनाल्ड ट्रम्प यांनी इराणवरील सर्वात मोठा हल्ला तात्पुरता थांबवला आहे. वरिष्ठ सल्लागार आणि मंत्रिमंडळाच्या सदस्यांसोबत बैठक घेतल्यानंतर ट्रम्प यांनी लष्कराला नवीन मोठे हल्ले थांबवण्याचे आदेश दिले.

जर ही कारवाई आणखी वाढली, तर मध्य-पूर्वेत तैनात असलेल्या अमेरिकन लष्कराचा पॅट्रियट इंटरसेप्टर क्षेपणास्त्रांचा आणि इतर हवाई संरक्षण शस्त्रांचा साठा मोठ्या प्रमाणात कमी होऊ शकतो, असे अमेरिकेच्या लष्करी अधिकाऱ्यांनी सांगितल्यानंतर ट्रम्प यांनी मर्यादित हल्ले करण्याचे निर्देश दिल्याचे वृत्त आहे.

हल्ले थांबवण्याचा हा निर्णय तात्पुरता आहे की दीर्घकाळासाठी लागू राहील, हे अद्याप स्पष्ट नाही. तथापि, गरज पडल्यास अमेरिकी सैन्य मोठ्या लष्करी कारवाईसाठी सज्ज आहे.
मोठ्या कारवाईमुळे मध्य-पूर्वेत तैनात असलेल्या अमेरिकन सैन्याच्या आणि मित्रराष्ट्रांच्या सुरक्षेला धोका निर्माण होऊ शकतो, असा सल्ला जॉइंट चीफ्स ऑफ स्टाफचे अध्यक्ष जनरल डॅन केन यांनी दिला. एप्रिलच्या अखेरपर्यंत अमेरिकेने 1,200 हून अधिक पॅट्रियट इंटरसेप्टर क्षेपणास्त्रे तैनात केली होती.