‘बृंदा’ सीरिजमध्ये तृषा कृष्णन

2 ऑगस्टला होणार प्रदर्शित

तृषा कृष्णन ही दक्षिण भारतातील दिग्गज अभिनेत्री आहे. ती तमिळ, तेलगू आणि मल्याळी चित्रपटांमध्ये दिसून येते. तिने तमिळ चित्रपट सामी, गिल्ली आणि तेलगू चित्रपट वर्षमद्वारे यश मिळविले होते. यानंतर तिने अनेक हिट चित्रपटांमध्ये काम केले होते. 2010 मध्ये तिने ‘खट्टा मीठा’ या चित्रपटाद्वारे बॉलिवूडमध्ये पदार्पण केले होते, अलिकडेच ती लियो या चित्रपटात दिसून आली होती. तृषा आता ओटीटीवर पदार्पण करणार आहे.

तृषा सध्या तेलगू चित्रपट ‘विश्वभंर’च्या चित्रिकरणात व्यग्र आहे. या चित्रपटात ती सुपरस्टार चिरंजीवीसोबत दिसून येणार आहे. याचबरोबर ती ‘बृंदा’ या सीरिजद्वारे ओटीटीवर पदार्पण करणार आहे. ही एक मनोरंजक थ्रिलर सीरिज असुन यात ती पोलीस अधिकाऱ्याची भूमिका साकारत आहे.

तृषाची ही सीरिज सोनी लिववर प्रदर्शित होणार आहे.  ही सीरिज 2 ऑगस्टपासून प्रेक्षकांना पाहता येणार आहे. तेलगू, हिंदी, कन्नड, मल्याळी, तमिळ, मराठी आणि बंगाली भाषेत ही सीरिज प्रदर्शित होणार आहे. या सीरिजमध्ये तिच्यासोबत इंद्रजीत सुकुमारन, जया प्रकाश, आमानी, रविंद्र विजय, आनंद सामी, राकेंदु मौली हे कलाकार दिसून येणार आहेत. तृषा याचबरोबर तमिळ चित्रपट ‘विदा मुयार्ची’ आणि ‘ठग लाइफ’मध्ये दिसून येईल.