ट्रॅक्टर-दुचाकी अपघातात तोपिनकट्टीचा युवक जागीच ठार

तोपिनकट्टी-लोकोळी रस्त्यावर दुर्घटना

खानापूर : खानापूर तालुक्यातील लोकोळी-तोपिनकट्टी रस्त्यावर रविवारी रात्री ट्रॅक्टर व दुचाकी यांच्यात झालेल्या अपघातात तोपिनकट्टी येथील नागराज पुंडलिक तिरवीर (वय 20) हा युवक जागीच ठार झाला. या अपघाताची नोंद खानापूर पोलीस स्थानकात झाली आहे. याबाबत पोलिसांकडून मिळालेली माहिती अशी की, सध्या सुगीचा हंगाम सुरू आहे. यासाठी सर्वत्र भातमळणी सुरू आहे. रविवारी सायंकाळी 7 च्या दरम्यान लोकोळी-तोपिनकट्टी रस्त्यावर ट्रॅक्टर क्रमांक केए 22-बी-4270, ट्रॉली क्रमांक केए 22-बी-4271 हा ट्रॅक्टर तोपिनकट्टीच्या दिशेने वेगाने चालला होता.

याचवेळी नागराज पुंडलिक तिरवीर हा आपल्या शेताकडून घराकडे पोती आणण्यासाठी दुचाकी क्रमांक केए 22 एचआर 3711 वरून चालला असता ट्रॅक्टरला ओव्हरटेक करताना मागील ट्रॉलीची जोराची धडक बसल्याने तो रस्त्याच्या कडेला फेकला गेला. त्यामुळे त्याच्या डोक्याला गंभीर दुखापत झाल्याने तो जागीच ठार झाला. खानापूर पोलीस स्थानकाचे निरीक्षक मंजुनाथ नाईक, उपनिरीक्षक एम. गिरीश यांनी फौजफाट्यासह घटनास्थळी दाखल होऊन पंचनामा केला. रात्री उशिरा ट्रॅक्टर व ट्रॉली ताब्यात घेऊन चालकावर गुन्हा नोंद केला आहे. सोमवारी सकाळी उत्तरीय तपासणी करून मृतदेह नातेवाईकांच्या ताब्यात दिला. तोपिनकट्टी येथील स्मशानभूमीत नागराजवर अंत्यसंस्कार करण्यात आले. त्याच्या पश्चात आई, वडील, भाऊ, बहीण, काका, काकू असा परिवार आहे. नागराजच्या अपघाती मृत्यूमुळे गावावर शोककळा पसरली आहे.