आज पारपोली पावणाई व रवळनाथ देवस्थानचा जत्रोत्सव

ओटवणे:प्रतिनिधी

पारपोली गावचे ग्रामदैवत येथील पावणाई व रवळनाथ देवस्थानचा वार्षिक जत्रोत्सव आज शुकवारी होत आहे. नवसाला पावणारा रवळनाथ आणि माहेरवाशिणीची पाठीराखी अशी पावणाईची ख्याती असल्याने या जत्रोत्सवासाठी भाविकांची अलोट गर्दी होणार आहे.यानिमित्त मंदिरात सकाळी धार्मिक कार्यक्रम आटोपल्यानंतर पावणाई व रवळनाथाला भरजरी वस्त्र व सुवर्ण अलंकारांसह आकर्षक फुलांनी सजवीण्यात आले आहे. सकाळी सवाद्य कुळघराकडून पालखी तर थळकरांकडून तरंग खांब मंदिराकडे आणल्यानंतर देवस्थानच्या मानकऱ्यांच्या उपस्थितीत पावणाईची मानाची ओटी भरण्यात आली. त्यानंतर श्रीच्या दर्शनास प्रारंभ झाला. रात्री उशिरापर्यंत भाविकांची गर्दी होणार आहे. यानिमित्त रात्री सवाद्य पालखी मिरवणूकीनंतर उशिरा आरोकर दशावतार कंपनीचे नाटक होणार आहे.भाविकांनी कार्यक्रमाचा लाभ घ्यावा असे आवाहन देवस्थानचे मानकरी, स्थानिक देवस्थान कमिटी आणि पारपोली ग्रामस्थांनी केले आहे.