आज कारिवडे कालिका पंचायतन देवस्थानचा वार्षिक जत्रोत्सव

ओटवणे | प्रतिनिधी
कारिवडे ग्रामदैवत श्री देवी कालिका अर्थात काळकाई रवळनाथ पावणाई पंचायतन देवस्थानचा वार्षिक जत्रोत्सव शनिवार ६ डिसेंबरला होणार आहे. यानिमित्त मंदिरात सकाळी धार्मिक कार्यक्रम आटोपल्यानंतर कालिका देवीला भरजरी वस्त्र व सुवर्ण अलंकारांसह आकर्षक फुलांनी सजविण्यात येणार आहे. त्यानंतर देवस्थानच्या मानकऱ्यांच्या उपस्थितीत देवीची मानाची ओटी भरल्यानंतर देवीच्या दर्शनासाठी रात्री उशिरापर्यंत भाविकांची गर्दी होते. यानिमित्त रात्री सवाद्य पालखी मिरवणुकीनंतर उशिरा आरोलकर दशावतार कंपनीचे नाटक होणार आहे. भाविकांनी कार्यक्रमाचा लाभघ्यावा, असे आवाहन गावप्रमुख, देवस्थानचे मानकरी आणि स्थानिक देवस्थान उपसमितीचे अध्यक्ष बाबा गावकर तसेच खजिनदार आणि मानकरी शुभम गावकर तसेच देवस्थान कमिटी सचिव दत्ताराम गावडे आणि कारिवडे ग्रामस्थांनी केले आहे.