...तर ‘सीजेपी’ पुन्हा आंदोलन छेडणार!

 विद्यार्थ्यांचा छळ थांबवण्याचा अभिजीत दीपके यांचा इशारा

वृत्तसंस्था

नवी दिल्ली

कॉक्रोच जनता पक्षाचे संस्थापक अभिजीत दीपके यांनी पुन्हा एकदा मोठ्या आंदोलनाचा इशारा दिला आहे. ‘एक्स’ या सोशल मीडिया प्लॅटफॉर्मवरील एका पोस्टमध्ये दीपके यांनी जर पोलिसांनी विद्यार्थ्यांचा छळ करणे सुरूच ठेवले, तर कॉक्रोच जनता पक्ष लवकरच एका मोठ्या आणि शांततापूर्ण आंदोलनाने प्रत्युत्तर देईल, असे म्हटले आहे. सरकारने विद्यार्थ्यांना लक्ष्य करणे आणि त्यांचा छळ करणे थांबवले पाहिजे, असेही त्यांनी म्हटले आहे. केंद्र सरकारने या गटाची एक प्रमुख मागणी मान्य केल्यानंतर आंदोलने संपली आहेत, परंतु सीजेपी नेते अजूनही आपल्या मागण्यांवर आग्रही आहेत. सीजेपीच्या नेत्यांनी आपली संघटना शिक्षण सुधारणांसाठी मोहीम सुरू ठेवेल आणि आपले आंदोलन तळागाळापर्यंत घेऊन जाईल, असे स्पष्ट केले आहे. संघटना युवकांशी संबंधित प्रश्न मांडत राहील आणि शिक्षण व प्रशासनात सुधारणा घडवून आणण्यासाठीही प्रयत्न करेल, असे  सीजेपीचे प्रवक्ते सौरभ दास यांनी पुन्हा एकदा जाहीर केले आहे.