‘सिटाडेल : हनी बनी’चा ट्रेलर सादर

वरुण धवन अन् समांथा मुख्य भूमिकेत

वरुण धवन आणि समांथा  रुथ प्रभू यांची मुख्य भूमिका असलेल्या ‘सिटाडेल : हनी बनी’ सीरिजचा ट्रेलर सादर करण्यात आला आहे. या आगामी सीरिजच्या ट्रेलरची चाहत्यांना मोठी आतुरता होती. दोन्ही कलाकार या सीरिजमध्ये गुप्तहेराच्या भूमिकेत दिसून येणार आहेत.

या सीरिजचा ट्रेलर अत्यंत दमदार आणि अॅक्शनने भरपूर आहे. या सीरिजचे दिग्दर्शन राज आणि डीके यांनी केले आहे. तर सीता आर. मेनन यांच्यासोबत राज आणि डीके यांनी याची कहाणी लिहिली आहे. ही सीरिज डी2आर फिल्म्स, अमेझॉन एमजीएम स्टुडिओज आणि एजीबीओच्या रुसो ब्रदर्सकडून निर्माण करण्यात आली आहे.

यात स्टंटमन असलेला बनी (वरुण धवन), हनी (समांथा) हे हेरगिरी आणि विश्वासघाताच्या जगतात अडकून पडत असल्याचे दाखविण्यात आले आहे. स्वत:चा धोकादायक भूतकाळ समोर येताच वेगळे झालेल्या हनी आणि बनी यांना स्वत:ची मुलगी नादियाच्या सुरक्षेसाठी पुन्हा एकजूट होत लढावे लागत असल्याचे ट्रेलरमध्ये दाखविण्यात आले आहे.

या सीरिजमध्ये के.के. मेनन देखील दिसून येणार आहे. याचबरोबर सिमरन, साकिब सलीम, सिकंदर खेर, सोहम मजूमदार, शिवांकित परिहार आणि कश्वी मजूमदार यात भूमिका साकारत आहेत.  ही सीरिज 7 नोव्हेंबर भारतात प्राइम व्हिडिओवर प्रदर्शित होणार आहे.