नैसर्गिक आपत्तींमधून देशाची ‘परीक्षा’!

पंतप्रधान मोदींची ‘मन की बात’ : बचावकार्यात मोलाची मदत करणाऱ्यांचे मानले आभार

वृत्तसंस्था/ नवी दिल्ली

पंतप्रधान नरेंद्र मोदी यांनी आपल्या ‘मन की बात’ या रेडिओ कार्यक्रमाच्या 125 व्या भागात रविवारी नैसर्गिक आपत्ती, क्रीडा, खेळाडू, नवोन्मेष, शिक्षण, व्होकल फॉर लोकल यावर भाष्य केले. या पावसाळ्यात नैसर्गिक आपत्ती आपल्या देशाची परीक्षा घेत आहेत. गेल्या काही आठवड्यात आपण भीषण पूर आणि भूस्खलन पाहिले आहे. या घटनांनी प्रत्येक भारतीयाला दु:ख दिले आहे. ज्या कुटुंबांनी आपले प्रियजन गमावले आहेत त्यांच्या दु:खात आम्ही सहभागी आहोत. जिथे जिथे आपत्ती आली तिथे आमच्या एनडीआरएफ-एसडीआरएफच्या जवानांनी, इतर सुरक्षा दलांसह, दिवसरात्र अथक परिश्रम केले आहेत, असे पंतप्रधान म्हणाले.

या पावसाळ्यात नैसर्गिक आपत्ती देशाची परीक्षा घेत आहेत. गेल्या काही आठवड्यात, आपण पूर आणि भूस्खलनाचे मोठे नुकसान पाहिले आहे. कुठेतरी घरे उद्ध्वस्त झाली, कुठेतरी शेते बुडाली, कुटुंबे उद्ध्वस्त झाली, कुठेतरी पूल पाण्याच्या वेगवान प्रवाहात वाहून गेले, रस्ते वाहून गेले, असे मोदी म्हणाले. या आपत्तींमुळे लोकांचे जीवन धोक्यात आले. या नैसर्गिक आपत्तींशी झुंज देताना एनडीआरएफ-एसडीआरएफसह इतर सुरक्षा दलांनी लोकांना वाचवण्यासाठी दिवसरात्र काम केले. सैनिकांनी तंत्रज्ञानाची मदत घेतली आहे. थर्मल कॅमेरे, लाईव्ह डिटेक्टर, स्निफर डॉग आणि ड्रोन सर्व्हिलन्स अशा अनेक आधुनिक संसाधनांच्या मदतीने मदतकार्याला गती देण्यासाठी बरेच प्रयत्न केले गेले. या काळात, हेलिकॉप्टरद्वारे मदत साहित्य पोहोचवण्यात आले, जखमींना विमानाने हलवण्यात आले. आपत्तीच्या वेळी सैन्य मदतीसाठी पुढे आले. स्थानिक लोक, सामाजिक कार्यकर्ते, डॉक्टर, प्रशासन, सर्वांनी या संकटाच्या काळात शक्य ते सर्व प्रयत्न केले. या कठीण काळात मानवतेला इतर सर्व गोष्टींपेक्षा वर ठेवणाऱ्या प्रत्येक नागरिकाचे मी मनापासून आभार मानतो, असे पंतप्रधान पुढे म्हणाले.

‘यूपीएससी’धारकांना नव्या संधी मिळणार

अनेक उमेदवार यूपीएससीच्या अंतिम यादीत येऊ शकले नाहीत. त्यांची माहिती डिजिटल प्लॅटफॉर्म प्रतिभा सेतू अॅपवर उपलब्ध करून दिली जात आहे. ही यादी देशातील मोठ्या कंपन्यांसोबत शेअर करून त्यांना विविध कंपन्यांमध्ये चांगल्या नोकऱ्या मिळवण्याचे नवे दालन खुले केले जाईल, असे पंतप्रधानांनी सांगितले.

गणेशोत्सवाचाही उल्लेख

‘मन की बात’मध्ये पंतप्रधानांनी गणेशोत्सवाचाही उल्लेख केला. सध्या देशभर ‘गणेश उत्सव’ साजरा केला जात आहे. येणाऱ्या काळात अनेक सण असतील. या सणांमध्ये तुम्ही स्वदेशी कधीही विसरू नये. या सणांमधील सजावट भारतात बनवलेल्या साहित्यापासून केली पाहिजे. जीवनाच्या गरजेची प्रत्येक वस्तू स्वदेशी असावी. तसेच या सगळ्या आनंदी वातावरणात तुम्ही सर्वांनी स्वच्छतेवरही भर देत राहायला हवा. कारण जिथे स्वच्छता असते तिथे सणांचा आनंद आणखी वाढतो, असेही पंतप्रधानांनी सांगितले.