तीन तासात चेक क्लिअरचा टप्पा पुढे ढकलला

आरबीआयची माहिती : चेक क्लिअरन्स  : टप्पा नं. 2 ची सध्या अंमलबजावणी नाही

वृत्तसंस्था/ नवी दिल्ली

रिझर्व्ह बँक ऑफ इंडिया (आरबीआय) ने जाहीर केले की, बँकांसाठी जलद चेक क्लिअरन्स फ्रेमवर्कच्या फेज 2 च्या अंमलबजावणीची तारीख पुढे ढकलण्यात आली आहे. हा टप्पा 3 जानेवारी 2026 पासून सुरू होणार होता. आता तो पुढे ढकलण्यात आला आहे.

आरबीआयच्या निवेदनानुसार, बँकांना त्यांच्या प्रक्रिया सुलभ करण्यासाठी अधिक वेळ देण्यासाठी फेज 2 ची अंमलबजावणी पुढील आदेशापर्यंत पुढे ढकलण्यात येत आहे. या प्रणालीतील फेज 1 काम करत राहील. या वर्षी फेज 1 लागू करण्यात आला. आरबीआयने असेही कळवले आहे की, चेक डिपॉझिटची वेळ देखील बदलण्यात आली आहे. आता चेक डिपॉझिटची वेळ सकाळी 9 ते दुपारी 3 वाजेपर्यंत असेल. त्याच वेळी, बँका सकाळी 9 ते संध्याकाळी 7 वाजेपर्यंत चेकची पुष्टी किंवा नाकारू शकतील. प्रस्तावित फेज 2 मार्गदर्शक तत्त्वांनुसार, बँकांना काउंटरवर जमा केलेला कोणताही चेक फक्त तीन तासांच्या आत क्लिअर किंवा नाकारायचा होता. ही प्रक्रिया सुरू झाल्यावर, ग्राहकांना जलद आणि अधिक कार्यक्षमतेने पैसे मिळतील.

फेज 2 म्हणजे काय?

दुसरा टप्पा 3 जानेवारी 2026 पासून सुरू करण्याचे नियोजन होते.  जेणेकरून बँक ग्राहकांना अधिक सुविधा मिळू शकतील. चेकची प्रतिमा मिळाल्यानंतर, बँकांना तो मंजूर करण्यासाठी किंवा नाकारण्यासाठी फक्त तीन तास असतात. यामध्ये, बँका चेक स्कॅन करतात आणि त्यांना चेक मिळताच, त्यांची प्रतिमा आणि एमआयसीआर डेटा क्लिअरिंग हाऊसला पाठवतात.