Sant Tukaram Maharaj Sohala | विठूनामाचा गजर अन भगव्या पताका; देहूनगरीत अवतरला भक्ती, परंपरा आणि उत्साहाचा अद्भुत संगम!
देहू -देहू नगरीत पालखी प्रस्थानाच्या क्षणांनी भक्ती, परंपरा आणि उत्साहाचा अद्भुत संगम अनुभवायला मिळाला. मंदिर परिसरात पांढऱ्या शुभ्र वेशातील हजारो वारकऱ्यांनी केलेली गर्दी, भगव्या पताका, टाळ-मृदंगाचा गजर आणि "ज्ञानोबा-तुकाराम"च्या अखंड जयघोषाने संपूर्ण परिसर भक्तिमय झाला होता.
मंदिराच्या उंचावरून टिपलेल्या दृश्यांमध्ये देहू मंदिर परिसर अक्षरशः वारकऱ्यांच्या समुद्राने भरून गेल्याचे पाहायला मिळत होते. मंदिराची आकर्षक फुलांची सजावट, भगव्या ध्वजांनी नटलेला परिसर आणि लाखो भाविकांची उपस्थिती या सोहळ्याच्या भव्यतेची साक्ष देत होती.एका छायाचित्रात टाळकरी आणि मृदंगवादक हरिनामाच्या तालावर रंगून गेलेले दिसतात. हातात टाळ, चेहऱ्यावर विठ्ठलनामाचा आनंद आणि भक्तीच्या लयीत हरवलेले वारकरी वारीची अनोखी ऊर्जा अनुभवायला लावतात.
रिमझिम पावसातही वारकऱ्यांचा उत्साह किंचितही कमी झालेला नव्हता. ओल्या मातीत आणि पावसाच्या सरींमध्ये फुगड्या खेळत, एकमेकांना खांद्यावर घेत आनंदोत्सव साजरा करणाऱ्या वारकऱ्यांनी वारी म्हणजे केवळ यात्रा नसून ती भक्ती, समर्पण आणि आनंदाचा उत्सव असल्याची प्रचिती दिली. श्री संत तुकाराम महाराजांच्या मंदिरासमोर हजारो वारकरी शिस्तबद्ध उभे राहून पालखी प्रस्थानाची आतुरतेने वाट पाहत असल्याचे दृश्य विशेष लक्षवेधी ठरले.
मंदिराच्या प्रवेशद्वारावर केलेली आकर्षक फुलांची सजावट आणि समोर हरिनामात तल्लीन झालेले वारकरी हा भक्तीचा अविस्मरणीय क्षण ठरला. . या सोहळ्याची भव्यता आणि प्रत्येक क्षण जगासमोर पोहोचवण्यासाठी छायाचित्रकारांनी घेतलेली मेहनतही या निमित्ताने अधोरेखित झाली.
देहू नगरीतील भक्ती, वारकरी संप्रदायाची शिस्त, परंपरेचा वारसा आणि विठ्ठलभक्तीचा महासागर जिवंत झाल्याचे चित्र पाहायला मिळते. लाखो वारकरी एकाच ध्यासाने—"विठुरायाच्या भेटीचा"—पंढरपूरच्या दिशेने मार्गस्थ झाल्याचे हे दृश्य प्रत्येक भाविकासाठी प्रेरणादायी ठरले.