वस्त्रद्योगाला तीव्र उष्णतेचा फटका

कारखान्यांचे उत्पादन घटले : कामगारांच्या आरोग्यालाही धोका : अहवालामधून माहिती

वृत्तसंस्था, नवी दिल्ली

प्रिमार्क, डी-मार्ट, टार्गेट, मार्क्स अँड स्पेन्सर, टेस्को, टॉमी हिलफिगर आणि नेक्स्ट यांसारख्या ब्रँड्सना कापडाचा पुरवठा करणाऱ्या वस्त्राsद्योगाच्या कारखान्यांमध्ये तीव्र उष्णता आणि आर्द्रतेमुळे कामगारांच्या आरोग्यावर परिणाम होत असून उत्पादकतेत 10 टक्क्यांपर्यंत घट होत आहे. ही माहिती न्यूयॉर्क युनिव्हर्सिटीच्या स्टर्न सेंटर फॉर बिझनेस अँड ह्युमन राइट्सने प्रसिद्ध केलेल्या अहवालामधून देण्यात आली आहे.

दरम्यान तामिळनाडू, हरियाणा, ओडिशा, महाराष्ट्र आणि कर्नाटक येथील 10 वस्त्राsद्योगाच्या कारखान्यांना भेट दिल्यानंतर हा अहवाल तयार करण्यात आला आहे. आंतरराष्ट्रीय कामगार संघटनेच्या एका निवेदनानंतर हे निष्कर्ष समोर आले आहेत, ज्यात म्हटले आहे की, जागतिक कार्यरत लोकसंख्येच्या 70 टक्के, म्हणजेच 24.1 अब्ज कामगारांना दरवर्षी तीव्र उष्णतेचा त्रास होण्याची शक्यता आहे. यामुळे दरवर्षी 23 लाख लोकांना किरकोळ दुखापती होतात आणि 19,000 लोकांचा मृत्यू होतो.

भारत हा जगातील सहावा सर्वात मोठा वस्त्र निर्यातदार देश आहे. वाढत्या तापमानाचे आर्थिक परिणाम त्याला आधीच जाणवत आहेत. अहवालानुसार, उष्णतेशी संबंधित खर्चामुळे कामगारांचे दरमहा सुमारे 500-1,000 रुपयांचे नुकसान होत आहे, जो त्यांच्या सरासरी मासिक वेतनाचा (सुमारे 11,500-18,000 रुपये) एक मोठा हिस्सा आहे.

पुरवठादारांनी सांगितले की, जर ब्रँड्सनी तांत्रिक सहाय्य पुरवण्याचा खर्च उचलला, तर ते उष्णतेपासून संरक्षणाच्या उपायांमध्ये अधिक गुंतवणूक करण्यास तयार आहेत. सर्वेक्षण केलेल्या 94.1 टक्के कपडे आणि पादत्राणे ब्रँड्सनी सांगितले की, अतिरिक्त उष्णतेमुळे उत्पादनासाठी मध्यम ते गंभीर धोका निर्माण होतो, परंतु केवळ 35.3 टक्के ब्रँड्सना पुरवठादारांनी उत्पादन क्षेत्रातील तापमान आणि आर्द्रता मोजावी अशी अपेक्षा आहे आणि कोणताही ब्रँड सातत्याने या प्रकारचा डेटा गोळा करत नाही.