टाटा समूह 5 वर्षांत 5 लाख रोजगार निर्माण करणार

टाटा समूहाचे अध्यक्ष एन चंद्रशेखरन :  इलेक्ट्रिक वाहने, बॅटरीसह अन्य उद्योगांमध्ये संधी

मुंबई :

टाटा समूह पुढील पाच वर्षांत अर्धसंवाहक, इलेक्ट्रिक वाहने, बॅटरी आणि इतर संबंधित उद्योगांमध्ये 5 लाख जणांसाठी रोजगार निर्माण करेल. टाटा समूहाचे अध्यक्ष एन चंद्रशेखरन यांनी ही घोषणा करत दावा केला आहे. इंडियन फाऊंडेशन फॉर क्वालिटी मॅनेजमेंटने आयोजित केलेल्या परिसंवादात ते बोलत होते.

जर देश उत्पादन क्षेत्रात नोकऱ्या निर्माण करू शकत नसेल, तर भारत विकसित राष्ट्र म्हणून आपले ध्येय साध्य करू शकत नाही.

पुढे ते म्हणाले की, ‘सेमीकंडक्टरमधील आमची (टाटा समूहाची) गुंतवणूक, अचूक उत्पादन, असेंबली, इलेक्ट्रिक वाहने, बॅटरी आणि संबंधित उद्योगांमधील आमची गुंतवणूक, मला वाटते की आम्ही पुढील पाच वर्षांत पाच लाख उत्पादनआधारीत रोजगार नक्कीच निर्माण करू शकू’.

अनेक प्रकल्पांची उभारणी

समूहाच्या आसाममधील आगामी सेमीकंडक्टर प्लांट आणि इलेक्ट्रिक वाहने आणि बॅटरीसाठी इतर नवीन उत्पादन युनिट्सचा हवाला देत, त्यांनी सर्व तपशील दिलेला नसला तरी, चंद्रशेखरन म्हणाले की मूलभूत गणितावर आधारित, या नोकऱ्यांमुळे अधिक नोकऱ्या मिळतील. एक इकोसिस्टम स्थापन केले जाणार असल्याने, या इकोसिस्टममध्ये किमान 5 लाख लहान, मध्यम आकाराच्या कंपन्याही स्थापन केल्या जातील, असे ते म्हणाले.

10 कोटी नोकऱ्या द्यायच्या आहेत

चंद्रशेखरन पुढे म्हणाले की, आम्हाला 10 कोटी नोकऱ्या निर्माण करायच्या आहेत. सेमीकंडक्टरसारख्या नवीन युगातील उत्पादनाचे महत्त्व त्यांनी स्पष्ट केले, जे प्रत्येक निर्माण केलेल्या नोकरीमागे आठ ते दहा अप्रत्यक्ष नोकऱ्या निर्माण करतात.