‘तृणमूल काँग्रेस’बाबत 4 महिन्यांत निर्णय घ्या!

निवडणूक चिन्हाबाबत सर्वोच्च न्यायालयाकडून आयोगाला मुदत : ममता बॅनर्जींच्या याचिकेवर सुनावणी

वृत्तसंस्था/ नवी दिल्ली

तृणमूल काँग्रेसचे नाव आणि निवडणूक चिन्हावरून सुरू असलेल्या वादावर निर्णय घेण्यासाठी सर्वोच्च न्यायालयाने निवडणूक आयोगाला चार महिन्यांची मुदत दिली आहे. पक्षावरील नियंत्रणावरून दोन गटांमध्ये सुरू असलेल्या वादाच्या पार्श्वभूमीवर निवडणूक आयोगाने दोन्ही पक्षांना पर्यायी नावे आणि निवडणूक चिन्हे दिली आहेत. सध्याची परिस्थिती अनिश्चित काळासाठी चालू राहू शकत नसल्याने आयोगाने चार महिन्यांत निर्णय घ्यावा. चार महिन्यांत हे प्रकरण सोडवण्यात निवडणूक आयोगाला काही अडचणी आल्यास, ते न्यायालयात अर्ज दाखल करू शकतात, असे सर्वोच्च न्यायालयाने म्हटले आहे.

सर्वोच्च न्यायालयाने पश्चिम बंगालच्या माजी मुख्यमंत्री ममता बॅनर्जी यांनी दाखल केलेल्या याचिकेवर सोमवारी सुनावणी केली. ममता बॅनर्जी यांनी निवडणूक आयोगाच्या तृणमूल काँग्रेसचे नाव आणि गवत-फुलाचे निवडणूक चिन्ह गोठवण्याच्या निर्णयाविरोधात याचिका दाखल केली आहे. चिन्ह गोठवण्याबाबत अंतिम निर्णय केव्हा घेतला जाईल, हे निवडणूक आयोगाने कळवावे, असे सर्वोच्च न्यायालयाने म्हटले आहे. आयोगाने हे प्रकरण तातडीने सोडवावे, असेही न्यायालयाने म्हटले आहे. निवडणूक आयोगाने चिन्हाबाबत लवकरच अंतिम निर्णय घेतला नाही, तर नोव्हेंबरमध्ये होणाऱ्या महापालिका निवडणुकांवर परिणाम होईल, असे ममता बॅनर्जी गटाने म्हटले आहे.