सुळगा-येळ्ळूर येथे तरुणावर तलवार हल्ला

भरदुपारी घडलेल्या घटनेने एकच खळबळ

बेळगाव : रविवारी दुपारी सुळगा-येळ्ळूर येथे तलवार हल्ल्याची घटना घडली आहे. हल्ल्यात एका तरुणाच्या हाताला गंभीर दुखापत झाली असून या घटनेने एकच खळबळ माजली आहे. रात्री उशिरा  बेळगाव ग्रामीण पोलीस स्थानकात परस्परांविरुद्ध एफआयआर दाखल करण्याची प्रक्रिया सुरू होती. दर्शन पाटील (वय 29, रा. भारतनगर, शहापूर) असे जखमी तरुणाचे नाव आहे. त्याच्यावर सिव्हिल हॉस्पिटलमध्ये उपचार करून नंतर त्याला खासगी इस्पितळात हलविण्यात आले आहे. घटनेची माहिती समजताच बेळगाव ग्रामीणचे पोलीस उपनिरीक्षक लक्काप्पा जोडट्टी व त्यांच्या सहकाऱ्यांनी घटनास्थळी धाव घेतली.

उपलब्ध माहितीनुसार डोक्यावर होणारा वार चुकविताना दर्शनच्या हाताला गंभीर दुखापत झाली आहे. त्याच्या डोक्यालाही दुखापत झाली आहे. जमीन वादातून ही घटना घडल्याची माहिती मिळाली आहे. यासंबंधी परस्परांविरुद्ध एफआयआर दाखल करण्यात आला आहे. दर्शन पाटील यांनी दिलेल्या फिर्यादीवरून अरविंद उर्फ चन्नाप्पा पाटील, विलास चौगुले, प्रभाकर, सुभाष कंग्राळकर, महेश बस्तवाडकर, संदीप जाधव यांच्यासह आणखी 15 जणांविरूद्ध एफआयआर दाखल करण्यात आला आहे. अरविंद पाटील यांनी दिलेल्या फिर्यादीवरून सय्याजी पाटील, विकास पाटील, परशराम पाटील, दर्शन पाटील व रंजन मर्वे आदींवर एफआयआर दाखल करण्यात आला आहे.