साखरेचे उत्पादन 20.65 लाख टनांनी घटले
कोल्हापूर / कृष्णात चौगले :
ऊस पिकावर होणारे रोग आणि प्रतिकूल हवामानामुळे यंदा साखर उत्पादनाला मोठा फटका बसला आहे. चालू गळीत हंगामात (2024-25) 15 जानेवारीपर्यंत देशातील साखरेचे उत्पादन मागील हंगामाच्या याच कालावधीच्या तुलनेत 20.65 लाख टन किंवा 13.66 टक्क्यांनी घटले आहे. हंगामाच्या अखेरीस साखरेचे उत्पादन अंदाजे 50 लाख टनांनी घटण्याची शक्यता आहे.
नॅशनल फेडरेशन ऑफ कोऑपरेटिव्ह शुगर फॅक्टरीज लिमिटेड (ऱ्इण्एइ) च्या आकडेवारीनुसार 15 जानेवारीपर्यंत देशातील साखरेचे उत्पादन 130.55 लाख टनांवर पोहोचले आहे, जे मागील वर्षी याच कालावधीत 151.20 लाख टन होते. चालू हंगामात एकूण साखरेचे उत्पादन 270 लाख टन राहण्याचा अंदाज आहे, जे मागील हंगामातील 319 लाख टन होते. साखर उत्पादनाची ही आकडेवारी इथेनॉल उत्पादनासाठी वळवलेल्या साखरेव्यतिरिक्त आहे. गतवर्षीच्या 524 कारखान्यांच्या तुलनेत या हंगामात 507 साखर कारखाने सुरु आहेत. ऊस पिकावर लाल कुजणे व इतर रोगांचा प्रादुर्भाव झाला आहे. याव्यतिरिक्त, तीव्र उष्णतेनंतर हिवाळा उशिरा सुरू झाल्याने साखर कारखान्यांचे कामकाज सुरू होण्यास विलंब झाला, ज्यामुळे उत्पादनात घट झाली.
- साखरेच्या रिकव्हरीमध्येही मोठी घट
देशातील सर्वात मोठे साखर उत्पादक राज्य असलेल्या उत्तर प्रदेशमध्ये 15 जानेवारीपर्यंतचे उत्पादन गेल्या वर्षीच्या 46.10 लाख टनांवरून घटून 42.85 लाख टन झाले आहे. महाराष्ट्रात गेल्या वर्षी याच कालावधीत 52.80 लाख टन साखरेचे उत्पादन झाले होते. कर्नाटकात 27.10 लाख टन उत्पादन झाले आहे, जे मागील वर्षी 31 लाख टन होते. उसापासून साखरेची रिकव्हरी देखील घटली आहे. 15 जानेवारीपर्यंत देशातील साखरेची सरासरी रिकव्हरी 8.81 टक्के होती, जी मागील वर्षी याच कालावधीत 9.37 टक्के होती. उत्तर प्रदेशात, साखरेची पुनर्प्राप्ती 9.90 टक्के वरून 9.05 टक्केपर्यंत घसरली. तर महाराष्ट्रात ती 8.95 टक्के वरून 8.80 टक्के पर्यंत घसरली.
- कर्नाटकच्या साखर उताऱ्यात सर्वात मोठी घट
साखरेच्या रिकव्हरीमध्ये सर्वात जास्त घसरण कर्नाटकमध्ये दिसून आली आहे. गेल्या वर्षीच्या 9.60 टक्के वरून रिकव्हरी 8.50 टक्के वर घसरली आहे. कर्नाटकात अतिवृष्टी झाल्यामुळे ऊस पिकावर आणखी परिणाम झाला आहे. साखर उत्पादनात झालेली घट आणि पुनर्प्राप्ती हे साखर उद्योगासमोर मोठे आव्हान आहे. परिणामी, साखरेची किमान विक्री किंमत आणि इथेनॉलची किंमत वाढवावी अशी साखर उद्योगातून मागणी होत आहे.
- साखरेचा किमान विक्री दर व इथेनॉलचा दर वाढविण्याची गरज
साखरेची किमान विक्री दरवाढ व इथेनाल दरवाढ हे निर्णय फारच लांबल्यामुळे व साखरेचे दर उत्पादन खर्चापेक्षा 600 ते 700 रूपयांनी कमी असल्यामुळे साखर कारखाने मोठ्या आर्थिक अडचणीत आहेत. जानेवारी 2025 पासून पुढे गाळप झालेल्या ऊसाची एफआरपी अदा कशी करावयाची ? हा यक्ष प्रश्न सर्वच कारखान्यापुढे उभा राहिला आहे. साखर उद्योग केंद्र शासनाच्या निर्णयाची चातक पक्षाप्रमाणे प्रतिक्षा करत आहे.
पी. जी. मेढे, साखर उद्येाग अभ्यासक