नादुरुस्त बसमुळे विद्यार्थी-प्रवाशांचे हाल

वार्ताहर/गुंजी

परिवहन खात्याच्या बेळगाव आगाराची बेळगाव-रामनगर ही बस गुंजीनजीक नादुरुस्त झाल्याने प्रवाशांचे अतोनात हाल झाले. सदर बस रामनगरहून बेळगावकडे जात असताना गुंजीनजीक जंगल भागात नादुरुस्त होऊन बंद पडल्याची घटना मंगळवारी सकाळी 10.30 सुमारास घडली. त्यामुळे त्या बसमधून प्रवास करणारे प्रवाशी सदर बसमधून उतरून रस्त्यावर बराच काळ दुसऱ्या वाहनाच्या प्रतीक्षेत ताटकळत उभे होते. त्यामुळे सर्व प्रवाशांना आपल्या नियोजित वेळेत पोहोचता आले नाही. त्यांना प्रचंड गैरसोयीचा सामना करावा लागला. तसेच विद्यार्थीवर्गाला शाळा कॉलेजमध्ये जाण्यास उशीर झाल्याने पहिल्या तासांना मुकावे लागले. त्यामुळे प्रवासी आणि विद्यार्थीवर्गातून संताप व्यक्त करण्यात येत होता. तरी परिवहन खात्याने सुस्थितीत असलेल्या बस सोडाव्यात आणि प्रवासी व विद्यार्थ्यांची गैरसोय टाळावी, अशी मागणी करण्यात आली आहे.