बंद पडलेली पाणीपुरवठा योजना सुरू
कंग्राळी बुद्रुक नागरिकांना दिलासा
कंग्राळी बुद्रुक/ वार्ताहर
येथील नेताजी गल्लीमधील बंद पडलेली पाणी पुरवठा योजना सुरू केल्यामुळे नागरिकांतून समाधान व्यक्त करण्यात येत आहे. ग्राम पंचायत सदस्य अनिल पावशे, सदस्य भारता पाटील, सुनिता कोळी यांनी शासकीय निधीतून अथक परिश्रम घेवून गेल्या कित्येक दिवसांपासून बंद पडलेली सदर योजना सुरू करून नागरिकांना दिलासा दिला आहे.
पूर्वी नेताजी गल्ली येथे नागरिकांना घरगुती पाणी वापरासाठी कूपनलिकेची खोदाई केली होती. सदर कूपनलिकेला पाणी भरपूर होते. परंतु सदर पाणी पिण्यायोग्य नसल्यामुळे फक्त घरगुती वापरासाठी वापरले जात होते. मात्र कूपनलिका नादुरुस्त झाल्यामुळे पाणीटंचाईला सामोरे जावे लागत होते. ग्राम पंचायत सदस्य अनिल पावशे व सहकाऱ्यांनी दुरुस्तीचे प्रयत्न केले. परंतु ती कूपनलिका दुरुस्त न झाल्यामुळे त्यांनी मरगाईनगर येथील मल्लाप्पा पाटील यांच्या दाराजवळ नवीन कूपनलिकेची शासकीय निधीतून खोदाई करून घेतली आणि नूतन कूपनलिकेला भरपूर पाणी लागल्यामुळे पाईप लाईनव्दारे नेताजी गल्लीतील पूर्वीच्या नळाला जोडून पाणी पुरवठा सुरू केला.
कूपनलिकेला पिण्यायोग्य पाणी
नवीन खोदाई केलेल्या कूपनलिकेला पिण्यायोग्य पाणी लागल्यामुळे आणि पाईपलाईनव्दारे हे पाणी नेताजी गल्लीमध्ये आणल्यामुळे नेताजी गल्लीतील नागरिकांना आता दररोज पिण्याचे पाणी मिळत आहे. त्यामुळे नागरिकांतून समाधान व्यक्त करण्यात येत आहे.