आयटी क्षेत्रातील कामगिरीमुळे शेअर बाजारात चमक

वृत्तसंस्था, मुंबई

भारतीय भांडवली बाजारात चालू आठवड्यात शुक्रवारी शेवटच्या सत्रात जोरदार खरेदी दिसून आली. यामध्ये आयटी स्टॉक्समधील खरेदीच्या जोरावर निर्देशांक वधारुन बंद झाला आहे. प्रमुख कंपन्यांच्या मदतीने बीएसई सेन्सेक्स हा दिवसअखेर 330.92 अंकांच्या तेजीसह निर्देशांक 77,264.51 वर बंद झाला आहे. दुसऱ्या बाजूला राष्ट्रीय शेअर बाजाराचा निफ्टी हा दिवसअखेर 84.80 अंकांच्या तेजीसह निर्देशांक  24,175.65 वर बंद झाला आहे.

आयटी क्षेत्रात प्रचंड खरेदी

क्षेत्रीय कामगिरी पाहता, आयटी स्टॉक्समध्ये सर्वाधिक वाढ नोंदवली गेली. निफ्टी आयटी निर्देशांक 3.51 टक्क्यांनी वाढून 31,281.70 वर बंद झाला. निर्देशांकात समाविष्ट असलेल्या सर्व 10 स्टॉक्समध्ये वाढ झाली. याशिवाय, निफ्टी धातू 0.75 टक्क्यांनी आणि निफ्टी फार्मा 0.53 टक्क्यांनी वाढला. दुसरीकडे, एफएमसीजी, ऑटो आणि बँकिंग स्टॉक्स दबावाखाली राहिले. निफ्टी एफएमसीजी निर्देशांक 0.46 टक्क्यांनी आणि निफ्टी ऑटो 0.11 टक्क्यांनी घसरला. निफ्टी बँक देखील 0.02 टक्क्यांनी किंचित घसरून 57,496.30 वर बंद झाला.

निफ्टीमध्ये समाविष्ट असलेले 30 स्टॉक्स वाढीसह बंद झाले. तर 19 स्टॉक्समध्ये घट झाली. 4 टक्क्यांच्या वाढीसह टीसीएस निर्देशांकातील सर्वाधिक वाढलेला स्टॉक होता. इन्फोसिस, टेक महिंद्रा आणि एचसीएल टेकच्या शेअर्समध्ये 2-3 टक्क्यांहून अधिक वाढ झाली. आयसीआयसीआय बँकेचा शेअर 15 टक्क्यांनी घसरला आणि सर्वाधिक तोटा सहन करणारा ठरला.

मिड-स्मॉलकॅप स्टॉक्समध्ये संमिश्र व्यवहार

व्यापक बाजारात संमिश्र व्यवहार दिसून आला. निफ्टी मिडकॅप 100 निर्देशांक 0.05 टक्क्यांच्या किरकोळ वाढीसह 64,069.50 वर बंद झाला. निफ्टी स्मॉलकॅप 100 निर्देशांक 0.20 टक्क्यांनी वाढून 20,080 वर पोहोचला. तथापि, निफ्टी नेक्स्ट 50 निर्देशांक 0.25 टक्क्यांनी घसरून 74,159.15 वर बंद झाला.

कच्चे तेल स्वस्त

अमेरिका आणि इराणमधील तणाव कायम असूनही, शुक्रवारी सकाळी कच्च्या तेलाच्या किमती घसरल्या. सप्टेंबर फ्युचर्स 0.35 टक्क्यांनी घसरून प्रति बॅरल सुमारे 88.20 डॉलरवर व्यवहार करत होते. सोने आणि चांदीमध्येही घसरण दिसून आली. सोन्याचे वायदे सुमारे 0.75 टक्क्यांनी घसरले, तर चांदी 1.21 टक्क्यांनी खाली आली. गुंतवणूकदार जॅक्सन होल बैठकीतील संकेतांची वाट पाहत आहेत.